اسلام آباد۔8جولائی (اے پی پی):سپیکر قومی اسمبلی سردار ایاز صادق نے کہا ہے کہ پاکستانی قوم کشمیری بھائیوں اور بہنوں کے ساتھ مکمل یکجہتی کا اظہار کرتی ہے اور ان کی حق خودارادیت کی جائز جدوجہد کی سیاسی، سفارتی و اخلاقی حمایت جاری رکھے گی۔
برہان وانی کی برسی کے موقع پر اپنے پیغام میں انہوں نے کہا کہ بھارت کے جبر و استبداد کے باعث کشمیری عوام کے حقوق کو سلب کیا جا رہا ہے، اگر یہ سلسلہ بند نہ ہوا تو اقوام متحدہ جیسے عالمی اداروں کی ساکھ بری طرح متاثر ہوگی۔ سپیکر قومی اسمبلی نے عالمی برادری پر زور دیا کہ وہ کشمیریوں سے کیے گئے وعدوں کی تکمیل کو یقینی بنائے۔سپیکر قومی اسمبلی نے کہا کہ بھارت نے مقبوضہ کشمیر میں ظلم و ستم کا بازار گرم کر رکھا ہے جس کے خلاف بھارت کے اندر بھی آوازیں بلند ہو رہی ہیں کیونکہ انسانی ضمیر ظلم کو قبول نہیں کرتا۔
انہوں نے کہا کہ کشمیر کی جدو جہد آزادی کیلئے جانوں کا نذرانہ پیش کرنے والے شہداء کا خون رائیگاں نہیں جائے گا۔ سپیکر قومی اسمبلی نے اس امید کا اظہار کیا کہ مقبوضہ کشمیر میں جلد آزادی کا سورج طلوع ہو گا اور کشمیری عوام آزادی کے ساتھ اپنی زندگیاں گزار سکیں گے۔
