پاکستان اور ازبکستان کے درمیان تجارتی تعاون بڑھانا وقت کی ضرورت ہے، ناصر منصور قریشی

اسلام آباد۔17مارچ (اے پی پی):اسلام آباد چیمبر آف کامرس اینڈ انڈسٹری (آئی سی سی آئی)نے پیر کو ازبکستان کے تجارتی اور اقتصادی قونصلر بہرام یوسپوف کی زیرقیادت وفد کی میزبانی کی ۔ اس موقع پر ازبکستان کے پھلوں، سبزیوں، مشروبات اور کنفیکشنری کے شعبوں کے نمائندوں پر مشتمل وفد نے اسلام آباد کے کاروباری رہنماؤں کے ساتھ تجارت اور سرمایہ کاری کے نئے مواقع تلاش کرنے کے لئے نتیجہ خیز بی 2 بی ملاقاتیں کیں۔

آئی سی سی آئی سے جاری پریس ریلیز کے مطابق اپنے خطبہ استقبالیہ میں آئی سی سی آئی کے صدر ناصر منصور قریشی نے تجارت، سرمایہ کاری اور صنعتی ترقی کو فروغ دینے کے لئے چیمبر کے عزم کو اجاگر کیا۔ انہوں نے ازبک کاروباری رہنماؤں کی حوصلہ افزائی کی کہ وہ پاکستان کے صنعتی زونز میں شراکتیں تلاش کریں، مشترکہ منصوبوں میں سرمایہ کاری کریں اور تجارتی نمائشوں میں حصہ لیں۔ازبکستان کے سفارتخانے میں تجارتی اور اقتصادی کونسلر بہرام یوسپوف نے بین الاقوامی کاروباری تعلقات کو فروغ دینے کے لئے آئی سی سی آئی کی قیادت کو سراہا۔

انہوں نے کاروباری دوستانہ ماحول پیدا کرنے کے لئے آئی سی سی آئی کے جاری اقدامات کو بھی سراہا جو مقامی اور غیر ملکی سرمایہ کاروں کی حوصلہ افزائی کرتے ہیں ۔ اپنے اختتامی کلمات میں آئی سی سی آئی کے سینئر نائب صدر عبدالرحمن صدیقی نے اس اعتماد کا اظہار کیا کہ بات چیت سے اقتصادی تعاون، کاروباری منصوبوں اور پائیدار شراکت داری کی نئی راہیں کھلیں گی۔

تقریب میں آئی سی سی آئی کے فائونڈر گروپ کے چیئر مین طارق صادق، نائب صدر ناصر محمود چوہدری، سابق صدر میاں شوکت مسعود، ایگزیکٹو ممبران عمران منہاس، نجیب الٰہی ملک، طاہر ایوب، ملک عقیل احمد، سابق ایس وی پی خالد چوہدری اور آئی سی سی آئی کے صدر کے سینئر ایڈوائزر کے علاوہ آئی سی سی آئی کے ممتاز رہنما بھی موجود تھے۔

Short Link: https://urdu.app.com.pk/urdu/?p=573515