لاہور۔15اپریل (اے پی پی):پنجاب اسمبلی کے ایوان نے غزہ میں اسرائیلی مظالم کے خلاف مذمتی اور اوورسیز پاکستانیوں کو خراج تحسین پیش کرنے سمیت مفاد عامہ کی قراردادیں منظور کر لیں۔پنجاب اسمبلی کا اجلاس مقررہ وقت کی بجائے ایک گھنٹہ 29 منٹ کی تاخیر سے سپیکر ملک محمد احمد خان کی صدارت میں شروع ہوا،اجلاس میں محکمہ سکولز ایجوکیشن کے بارے میں سوالوں کے جوابات دیئے گئے۔
سپیکر نے اپوزیشن کو احتجاج کرنے سے روک دیا جس پر اپوزیشن اراکین نشستوں پر بیٹھ گئے۔سپیکر ملک محمد احمد خان کی ہدایت پر سیکرٹری اسمبلی نے راحیلہ خادم حسین،آغا علی حیدر، سمیع اللہ خان، شوکت راجہ، ارشد ملک اور نادیہ کھر پر مشتمل پینل آف چیئرمین کا اعلان کیا۔اجلاس کے آغاز پر چوہدری ارشد جاوید وڑائچ ، سینیٹر تاج حیدر اورایران میں قتل کئے گئے آٹھ پاکستانی مزدوروں کے ایصال ثواب کے لئے فاتحہ خوانی کی گئی۔اجلاس کے دوران پیپلز پارٹی کے رکن ممتاز چانگ ایک بار پھر ڈی پی او رحیم یار خان کے خلاف پھٹ پڑے اور ان کی معطلی کا مطالبہ کردیا۔ہمیں میرٹ پر انکوائریاں چاہئیں جن پر جھوٹے مقدمات ہیں وہ ختم ہونے چاہئیں۔اجلاس کے دوران سٹی سائنس کالج قصور کی طالبات پنجاب اسمبلی آئیں جنہیں سپیکر نے خوش آمدید کہتے ہوئے کہا کہ ہم چاہتے ہیں کہ طلبہ و طالبات کو بھی پنجاب اسمبلی کی کارروائی دیکھنی چاہیے۔
بریگیڈیئر (ر)مشتاق نے اپنی گفتگو میں کہا کہ بلوچستان کا مسئلہ سیاسی ہے،پنجابیوں اور بے گناہ لوگوں کے قتل کی مذمت کرتے ہیں لیکن یہ مسئلہ انتظامی نہیں بلکہ اعتماد کا ہے۔ سپیکر ملک محمد احمد خان نے کہا کہ جہاں پنجابی قتل ہو رہے ہیں حکومت بلوچستان سے بات چیت ہونی چاہیے،پنجاب سے بلوچستان میں پارلیمانی وفود جانے چاہئیں،بلوچستان میں پنجابیوں کے قتل پر متفقہ طور پر قرارداد لائیں تاکہ وفاق اور بلوچستان حکومت کو پیغام دیا جائے۔اجلاس میں پرائیویٹ ممبر ڈے کے موقع پر مفاد عامہ سے متعلق قراردادوں کی منظوری دی گئی۔
اجلاس میں ترسیلات زر میں ریکارڈ اضافے پر اوورسیز کو خراج تحسین اور خصوصی رعایت فراہم کرنے ،چک فیض آباد تحصیل دیپالپور ضلع اوکاڑہ کا الگ موضع بنانے ،قذافی اسٹیڈیم کے قریب فائیو سٹار ہوٹل کی تعمیر،سیالکوٹ انٹرنیشنل ائیر پورٹ کو ٹیکسز سے چھوٹ،تمباکو نوشی پر ٹیکسز لگانے،غزہ میں اسرائیلی مظالم ، عوام کو صاف پانی کی فراہمی اور صوبہ میں عوامی عمارات میں ریمپز اور ریلنگز لگانے کی قرارداد یں متفقہ طورپر منظور کر لی گئیں۔
غزہ میں اسرائیلی مظالم کے خلاف منظور کی گئی مذمتی قرارداد کے متن میں کہا گیا کہ پنجاب اسمبلی کا ایوان حکومت سے مطالبہ کرتا ہے کہ وہ فلسطینیوں کی نسل کشی روکنے کے لئے اپنا بھرپور کردار ادا کرے، اقوام متحدہ ،او آئی سی اور دیگر انسانی حقوق کے عالمی ادارے غزہ میں بے گناہ انسانوں کا قتل عام روکنے کے لئے کردار ادا کریں۔پینل آف چیئرمین ملک ارشد نے ایجنڈا مکمل ہونے پر پنجاب اسمبلی کا اجلاس کل بدھ دوپہر دو بجے تک ملتوی کر دیا۔
Short Link: https://urdu.app.com.pk/urdu/?p=582546
