گجرات۔13ستمبر (اے پی پی):ڈپٹی کمشنر صفدر حسین ورک نے انسداد ڈینگی اقدامات کا جائزہ لینے کے لئے انسداد ڈینگی کمیٹی کے اجلاس کی صدارت کی۔ اور کہا ہے کہ شہری ڈینگی سے بچاو کے لئے احتیاطی تدابیر اختیار کریں،ڈینگی کی روک تھام کے لیے موثر اقدامات کئے جارہے ہیں،محکمہ صحت سمیت تمام محکمے ڈینگی سرویلنس کا احسن طریقے سے سرانجام دیں، ڈینگی سرویلنس میں کوتاہی برتنے والے افسران و اہلکاروں کے خلاف سخت محکمانہ کارروائی عمل میں لائے جائے گی،
کمرشل مقامات سے ڈینگی لاروا ملنے پر مقدمات درج کرائے جائیں گے،انسداد ڈینگی کمیٹی کے اجلاس میں ایم ایس عزیز بھٹی شہید ہسپتال ڈاکٹر شاہد مگسی،سی ای او ہیلتھ ڈاکٹر محمد عابد،ڈی ایچ او ڈاکٹر غمخوار حسین شاہ، ایاز ناصر، دیگر افسران موجود تھے۔ ڈپٹی کمشنر صفدر حسین ورک نے کہا کہ ضلع بھر میں ڈینگی کی ٹیمیں سرویلنس کررہی ہیں، شہری انسداد ڈینگی کے لئے آئی ٹیموں کے ساتھ تعاون کریں،
سرکاری ہسپتال اور جنرل پریکٹیشنر ڈینگی کے مشتبہ مریض رپورٹ کریں، تمام سرکاری ہسپتالوں میں ڈینگی کے مریضوں کے لیے الگ وارڈز مخصوص کریں اور وارڈز بہترین سہولیات فراہم کی جائیں۔ ڈپٹی کمشنر صفدر حسین ورک نے کہا کہ میونسپل کارپوریشن گجرات اور تمام میونسپل کمیٹیوں کا عملہ متحرک رہے اور کسی جگہ پانی نہ کھڑا ہونے دیا جائے،
کمرشل مقامات، پلازوں، شادی ہالز، سرکاری دفاتر سمیت قبرستانوں کی سخت سرویلنس کی جائے، ڈینگی ہاٹ سپاٹ کی مسلسل نگرانی کی جائے۔ ڈپٹی کمشنر صفدر حسین ورک نے شہریوں سے اپیل کی کہ ڈینگی ایک مہلک وائرس ہے، اس سے بچاو کا واحد حل احتیاطی تدابیر پر عمل کرنا ہے، شہری اپنے گھروں میں پانی کے برتن ڈھانپ کر رکھیں، دروازوں اور کھڑکیوں کو پر جالی استعمال کریں، اور ڈینگی علامات ظاہر ہونے کی صورت میں فوری ڈاکٹر سے رجوع کریں۔
Short Link: https://urdu.app.com.pk/urdu/?p=390248
