اسلام آباد۔26اگست (اے پی پی):محکمہ موسمیات نے انتباہ جاری کیا ہے کہ منگل کی رات ا ور 27اگست کے دوران موسلادھار بارش سے کشمیر( راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبراورمیرپور) میں لینڈ سلائیڈنگ کا خدشہ ہے جس کے باعث ٹریفک کی آمدورفت متاثر ہونے کا خطرہ ہے، اس دوران مقا می اور برساتی ندی نالوں میں طغیانی کا بھی امکان ہے۔ شدید بارش کے باعث ناروال، سیالکوٹ،گجرات،جہلم،منڈی بہائوالدین ،گوجرانوالہ اور لاہور کے نشیبی علا قے زیر آب آنے کاخدشہ ہے۔اس دوران مقا می اور برساتی ندی نالوں میں طغیانی کا بھی خطرہ ہے،عوام کو محتاط رہنے کی ہدایت کی گئی ہے،شدید بارش ، آندھی ،جھکڑ اور گرج چمک کے باعث روزمرہ کے معمولات متاثر ہونے، کمزور انفرا سٹرکچر (کچے گھر /دیواریں، بجلی کے کھمبے، بل بورڈز، گاڑیاں، سولر پینل وغیرہ) کو نقصان کا اندیشہ ہے۔محکمہ موسمیات کے مطابق کل (بدھ کو) شمال مشرقی پنجاب اور کشمیر میں بیشتر مقا مات پر جبکہ بالائی خیبر پختونخوا، وسطی/جنوبی پنجاب اور شمال مشرقی/جنوبی بلوچستان میں چند مقا مات پر تیز ہوائوں اور گرج چمک کے ساتھ بارش کی توقع ہے۔
اس دوران شمال مشرقی پنجاب اور کشمیر میں تیز/موسلادھار بارش کا امکان ہے،ملک کے دیگر علاقوں میں موسم گرم اور مر طوب رہنے کا امکان ہے۔گذشتہ 24 گھنٹوں کے دوران شمال مشرقی پنجاب، بالائی خیبر پختونخوا اورکشمیر میں تیز ہوائوں اور گرج چمک کے ساتھ بارش ہوئی جبکہ شمال مشرقی پنجاب میں کہیں کہیں موسلادھار بارش بھی ہو ئی۔ ملک کے دیگر علاقوں میں موسم گرم اور مرطوب رہا۔سب سے زیادہ بارش پنجاب: سیالکوٹ (سٹی 228، ایئرپورٹ 97)، نارووال 107، لاہور (سٹی 61، ایئرپورٹ 39)، قصور 42، گجرات، گوجرانوالہ 35، حافظ آباد 02، خیبر پختونخوا: کاکول 36، بالاکوٹ 06، مالم جبہ 05، کشمیر: گڑھی دوپٹہ 25، راولا کوٹ 04، بلوچستان: لسبیلہ میں 02ملی میٹر بارش ریکارڈ ہوئی۔منگل کو ریکارڈ کئے گئے زیادہ سےزیادہ درجہ حرارت دالبندین، نوکنڈی 42،چلاس اوردادو میں 41ڈگری سینٹی گریڈ ریکارڈ کیا گیا ۔
