آئی ایس ایس آئی کے زیر اہتمام”فالس فلیگ آپریشنز اینڈ الیکٹورل پولیٹکس آف انڈیا:ان ریولنگ دا نیکسس” پر گول میز ڈسکشن کا انعقاد

اسلام آباد۔23جنوری (اے پی پی):انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) کے انڈیا سٹڈی سینٹر نے "فالس فلیگ آپریشنز اینڈ الیکٹورل پولیٹکس آف انڈیا:ان ریولنگ دا نیکسس” کے موضوع پر ایک گول میز ڈسکشن کا انعقاد کیا۔ گول میز ڈسکشن کے شرکاء میں نامور سابق سفارت کار، دفاعی ماہرین، تھنک ٹینک کے نمائندے اور میڈیا اور تعلیمی برادری کے ارکان شامل تھے۔ اس تقریب کا مقصد علاقائی استحکام پر اس طرح کے واقعات کے ممکنہ مضمرات کا جائزہ لینے کے ساتھ ساتھ جنوبی ایشیا کے جغرافیائی سیاسی منظر نامے میں ذمہ دارانہ اقدامات کی ضرورت پر زور دینا تھا۔

منگل کو آئی ایس ایس آئی کی جانب سے جاری ایک پریس ریلیز کے مطابق ہندوستانی انتخابات سے قبل ایک اور جھوٹے فلیگ آپریشن کے امکانات، تاریخی نظیریں، سابقہ مثالوں میں طریقہ کار اور امن و سلامتی کے مسائل، دو طرفہ تعلقات سے متعلق عوامی تاثرات پر اس طرح کے واقعات کے اثرات پر غور کیا گیا۔

ماہرین نے پلوامہ واقعے کے ارد گرد کے واقعات، بالاکوٹ حملے کے بعد پاکستان کے تیز ردعمل اور سٹریٹجک، سفارتی اور معلوماتی میدانوں میں ملک کی بیک وقت مصروفیت کا تجزیہ کیا۔ شرکاء نے اس صورتحال میں انتہائی چوکسی اور مجموعی تیاری کی اہمیت کو اجاگر کیا۔ شرکاء نے فعال سفارت کاری کی اہمیت کے ساتھ ساتھ جنوبی ایشیا میں سٹریٹجک استحکام کو برقرار رکھنے کے لیے پاکستان کی کوششوں کو تسلیم کرنے اور اس کی حمایت میں بین الاقوامی برادری کے کردار پر بھی زور دیا۔