لاہور۔5مارچ (اے پی پی):آئی سی سی چیمپیئنز ٹرافی کے دوسرے سیمی فائنل میں نیوزی لینڈ نے جنوبی افریقہ کو 50رنز سے شکست دے کر فائنل میں رسائی حاصل کرلی، میگا ایونٹ کا فائنل 9مارچ کو دبئی میں نیوزی لینڈ اور بھارت کی ٹیموں کے درمیان ہوگا۔قذافی سٹیڈیم میں کھیلے گئے میچ میں نیوزی لینڈ نے پہلے بیٹنگ کرتے ہوئے راچن رویندرا اور کین ولیمسن کی شاندار سنچریوں کی بدولت مقررہ 50اوورز میں 6وکٹوں کے نقصان پر 362رنز بنائے۔
ہدف کے تعاقب میں جنوبی افریقہ کی جانب سے ڈیوڈ ملر کے علاوہ دیگر بلے باز خاطر خواہ کارکردگی نہیں دکھاسکے، پروٹیز نے ڈیوڈ ملر کی سنچری کی بدولت مقررہ 50اوورز میں 9وکٹوں کے نقصان پر 312رنز بنائے۔ آئی سی سی چیمپئنز ٹرافی 2025میں ٹورنامنٹ کا سب سے بڑا ٹوٹل بنانے کا ریکارڈ تیسری بار ٹوٹا ہے۔
آسٹریلیا اور انگلینڈ کے درمیان میچ میں چیمپئنز ٹرافی کا 21سالہ پرانا ریکارڈ ٹوٹا تھا جب انگلینڈ نے پہلے بیٹنگ کرتے ہوئے آسٹریلیا کو جیت کے لیے 352رنز کا ہدف دیا تاہم آسٹریلیا نے اسی میچ میں یہ ہدف حاصل کرکے ایک نیا ریکارڈ قائم کردیا ۔چیمپئنز ٹرافی کے سب سے بڑے ہدف کے تعاقب میں جنوبی افریقہ کی پہلی وکٹ 20رنز پر ہی گرگئی جب ریان رکلٹن 17رنز بنانے کے بعد آوٹ ہوگئے۔کپتان ٹمبا باووما نے راسی وین ڈار ڈوسن کے ساتھ ملکر 105رنز کی شراکت قائم کی، اس دوران دونوں کھلاڑیوں نے اپنی نصف سنچریاں مکمل کیں لیکن دونوں اپنی اننگز کو آگے نہیں بڑھاسکے۔
کپتان ٹمبا باووما56رنز بنانے کے بعد آوٹ ہوئے ، ڈوسن کی اننگز 69رنز پر ختم ہوگئی جس کے بعد ایڈن مارکرم بیٹنگ کیلئے آئے لیکن وہ 31رنز ہی بناسکے۔جنوبی افریقی کھلاڑی ہینرک کلاسن ون ڈے انٹرنیشنل میں اچھی فارم میں تھے اور ٹیم کو ان سے امید بھی تھی کہ وہ میچ کو کسی حد تک دلچسپ بنائیں گے لیکن بدقسمتی سے وہ صرف 3رنز کے ہی مہمان ثابت ہوئے۔
کیویز کی جانب سے اننگز کا آغاز کرنے والے ول ینگ 21اور ٹام لیتھم 4رنز بناکر آوٹ ہوئے۔راچن رویندرا اور کین ولیمسن نے دوسری وکٹ کیلئے 164رنز کی اہم شراکت قائم کی، اس دوران دونوں بلے بازوں نے پہلے اپنی نصف سنچریاں اور پھر سنچریاں مکمل کیں۔راچن رویندرا 101گیندوں پر ایک چھکا اور 13چوکوں کی مدد سے 108رنز بنانے کے بعد آوٹ ہوئے جب کہ کین ولیمسن نے 94گیندوں پر 102رنز کی اننگز کھیلی جس میں 2چھکے اور 10چوکے شامل تھے۔
ڈیرل مچل نے 37گیندوں پر 49رنز کی اننگز کھیلی ، گلین فلپس نے 27گیندوں پر 49رنز کی جارحانہ اننگز کھیلی جس میں ایک چھکا اور 6چوکے شامل تھے۔جنوبی افریقہ کی جانب سے لنکی نگیڈی نے 3، کاگیسو ربادا نے 2اور ویان ملڈر نے ایک وکٹ حاصل کی۔
Short Link: https://urdu.app.com.pk/urdu/?p=569209
