آئی سی ٹی پولیس نے بڑے بھائی کے قتل میں ملوث ملزم گرفتار کر لیا

اسلام آباد۔11جولائی (اے پی پی):اسلام آباد کیپیٹل ٹیریٹری (آئی سی ٹی) پولیس نے سنگجانی تھانے کی حدود میں اپنے بڑے بھائی کے قتل میں ملوث ملزم کو خیبر پختونخوا سے گرفتار کر لیا۔

پولیس کے ایک عہدیدار نے ہفتہ کو اے پی پی کو بتایا کہ ملزم فواد خان نے مبینہ طور پر گھریلو تنازع کے دوران اپنے بڑے بھائی شہزاد خان کو قینچی کے وار کر کے قتل کر دیا تھا۔عہدیدار کے مطابق واقعے کی اطلاع ملتے ہی پولیس نے فوری طور پر مقدمہ درج کر کے تحقیقات کا آغاز کر دیا۔ آئی جی اسلام آباد سید علی ناصر رضوی نے واقعے کا نوٹس لیتے ہوئے ڈی آئی جی اسلام آباد محمد جواد طارق کی نگرانی میں خصوصی ٹیمیں تشکیل دیں تاکہ ملزم کو جلد از جلد گرفتار کیا جا سکے۔پولیس کے مطابق سنگجانی تھانے کے ایس ایچ او اور تفتیشی ٹیم نے جدید تکنیکی نگرانی اور خفیہ معلومات کی مدد سے ملزم کا سراغ لگایا اور مختصر وقت میں اسے خیبر پختونخوا سے گرفتار کر لیا۔پولیس نے ملزم کی نشاندہی پر قتل میں استعمال ہونے والی مبینہ قینچی بھی برآمد کر لی ہے۔ابتدائی تفتیش میں ملزم نے انکشاف کیا کہ ناشتے کے دوران اپنے بڑے بھائی سے ہونے والی تلخ کلامی کے بعد یہ واقعہ پیش آیا۔ پولیس کے مطابق واقعے کی مزید تفتیش جاری ہے۔