آبادی میں بے تحاشا اضافے کے باعث نئے صوبے وقت کی اہم ضرورت ہیں۔عبدالعلیم خان

اسلام آباد۔15اگست (اے پی پی):صدر استحکام پاکستان پارٹی ( آئی پی پی)عبدالعلیم خان نے کہا ہے کہ آبادی میں بے تحاشا اضافے کے باعث نئے صوبے وقت کی اہم ضرورت ہیں۔

آئی پی پی کی جانب سے ہفتہ کو جاری بیان میں عبدالعلیم خان نے کہا کہ خیبرپختونخوا اسمبلی میں 2010 سے ہزارہ صوبے کے لئے آوازیں بلند ہو رہی ہیں ، خوشی ہے کہ خیبرپختونخوا کی اہم سیاسی جماعتیں ہزارہ صوبے کا قیام چاہتی ہیں۔ انہوں نے کہا کہ استحکام پاکستان پارٹی ہزارہ صوبے کے مطالبے کے ساتھ ہے۔ صدرآئی پی پی نے مزید کہا کہ پنجاب اور سندھ میں بھی کے پی کے کی طرح نئے صوبوں کے لئے آوازیں بلند ہو رہی ہیں ۔ انہوں نے کہا کہ آبادی میں بے تحاشا اضافے کے باعث نئے صوبے وقت کی اہم ترین ضرورت ہیں۔ عبدالعلیم خان نے جنوبی پنجاب اور بہاولپور صوبے کے قیام کی بھی حمائیت کرتے ہوئے کہا کہ نئے صوبوں کی تشکیل سے لوگوں کے مسائل کا حل بے حد ضروری ہے ،یہ قومی مسئلہ ہے، نئے صوبوں کو مصلحت یاسیاست کی بھینٹ نہیں چڑھنا چاہیے ۔عبدالعلیم خان نے کہا کہ ملکی مفاد میں مثبت تجویز کسی بھی پلیٹ فارم سے آئے اس کا خیر مقدم کریں گے۔ انہوں نے کہا کہ استحکام پاکستان پارٹی ہر فورم پر نئے صوبوں کی تشکیل کے لئے آواز اٹھاتی رہے گی۔عبدالعلیم خان نے کہا کہ دنیا میں کتنے ممالک کم آبادی کے باوجود پاکستان سے کہیں زیادہ صوبے رکھتے ہیں ۔