میلبورن۔19جنوری (اے پی پی):آسٹریلوی بگ بیش لیگ میں میلبورن سٹارز نے گلین میکسویل کی طوفانی بیٹنگ کی بدولت ہوبارٹ ہریکینز کو 40 رنز سے شکست دے دی ، میکسویل نے 32 گیندوں پر ناقابل شکست 76 رنز بنائے ، انہیں مرد میدان قرار دیا گیا
، گزشتہ روز ایم سی جی میں کھیلے گئے لیگ کے 40 ویں میچ میں میلبورن سٹارز نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 219 رنز بنائے ، گلین میکسویل نے شاندار بیٹنگ کا مظاہرہ کیا اور 32 گیندوں پر ناقابل شکست 76 رنز بنائے جس میں 6 چھکے اور 5 چوکے شامل تھے ،
بیو ویبسٹر 51 رنز کے ساتھ دوسرے نمایاں بیٹر رہے ، ہوبارٹ ہریکینز کی ٹیم مطلوبہ ہدف حاصل کرنے میں ناکام رہی اور پوری ٹیم 19.3 اوورز میں 179 رنز بنا کر آؤٹ ہو گئی ، نیتھن الیز 40 رنز بنا کر نمایاں رہے ، مارک سٹیکٹے نے شاندار باؤلنگ کا مظاہرہ کیا اور 4 وکٹیں حاصل کیں ۔
