اردن پولیس سروس اور نیشنل پولیس اکیڈمی کے سینئر پولیس افسران پر مشتمل وفد کا سکیورٹی ڈویژن کا دورہ

اسلام آباد۔23اکتوبر (اے پی پی):اردن پولیس سروس اور نیشنل پولیس اکیڈمی کے سینئر پولیس افسران پر مشتمل وفد نے سکیورٹی ڈویژن اسلام آباد کا دورہ کیا۔ایس ایس پی سکیورٹی کیپٹن (ر) سید ذیشان حیدر نے وفد کا استقبال کیا اور انہیں سکیورٹی ڈویژن کے مرکزی نظام اور اس کی کارکردگی سے متعلق تفصیلی بریفنگ دی۔پولیس ترجمان کے مطابق اردن پولیس سروس اور نیشنل پولیس اکیڈمی کے سینئر پولیس افسران پر مشتمل وفد نے سکیورٹی ڈویژن اسلام آباد کا دورہ کیا۔ ایس ایس پی سکیورٹی کیپٹن (ر) سید ذیشان حیدر نے وفد کا استقبال کیا اور انہیں سکیورٹی ڈویژن کے مرکزی نظام اور اس کی کارکردگی سے متعلق تفصیلی بریفنگ دی۔ وفد کو اسلام آباد پولیس کے مرکزی نظام، دفاتر کی ورکنگ اور کیمو نٹی پولیسنگ کے حوالے سے آ گا ہ کیا گیا۔

ایس ایس پی سکیورٹی ڈویژن نے وفد کو شہر میں لگے کیمرہ جات اور پولیس کی موثر کارکردگی ،ملکی و غیر ملکی اہم شخصیات ،غیر ملکی وفود، ہائی سکیورٹی زون میں واقع سفارت خانوں اور اہم سرکاری عمارات کی سکیورٹی کے متعلق بھی بریف کیا ۔ انہوں نے کہا کہ ہائی سکیورٹی زون کے تمام داخلی و خارجی راستوں پر موجود ناکہ جات پر تلاشی اور کوائف کے اندارج کے دوران جرائم کے انسداد اور مشکوک عناصر کی نشاندہی میں اہم کردار ادا کر رہے ہیں۔ دورہ کے دوران وفد کو سیف سٹی کنٹرول روم، سپیشل پروٹیکشن یونٹ اور پولیس خدمت مرکز "کیسکیڈ” کا بھی دورہ کروایا گیا جہاں مختلف شعبہ جات کی کارکردگی،جدید ٹیکنالوجی کے استعمال اور شہریوں کو فراہم کی جانے والی خدمات سے متعلق آگاہ کیا گیا۔

اردن پولیس سروس کے وفد نے اسلام آباد پولیس کے پیشہ ورانہ صلاحیتوں، موثر انتظامات اور جدید سکیورٹی نظام کو سراہا اور نیک خواہشات کا اظہار کیا۔ اس موقع پر ڈی آئی جی اسلام آباد محمد جواد طارق اور ایس ایس پی سکیورٹی نے وفد کو اسلام آباد پولیس کی جانب سے اعزازی شیلڈز بھی پیش کیں۔