لندن۔7اپریل (اے پی پی):برطانیہ نے اسرائیل کی جانب سے برسرِ اقتدار لیبر پارٹی کے 2 پارلیمنٹیرینز کو اسرائیل میں زیرِحراست رکھنے اور داخلے کی اجازت نہ دینے پر تشویش کا اظہار کرتے ہوئے کہا ہے کہ یہ ناقابلِ قبول ہے۔ اردو نیوز کے مطابق برطانوی میڈیا نے رپورٹ کیا تھا کہ لیبر پارٹی کے دو ارکان پارلیمنٹ یوان یانگ اور ابتسام محمد لندن سے اسرائیل پہنچے تھے۔رپورٹ کے مطابق دونوں ارکان کو اسرائیل نے ملک میں داخل ہونے کی اجازت نہیں دی اور حراست میں رکھنے کے بعد ڈی پورٹ کر دیا۔
برطانوی وزیر خارجہ ڈیوڈ لیمی نے بیان میں کہا کہ برطانیہ کے لئے اسرائیل کی جانب سے یہ اقدام ناقابل قبول، نقصان دہ اور گہری تشویش کا باعث ہے کہ پارلیمانی وفد میں شامل دو برطانوی ارکان پارلیمنٹ کو اسرائیلی حکام نے حراست میں لے لیا اور ملک میں داخلے کی اجازت دینے سے انکار کیا۔
انہوں نے کہا کہ میں نے اسرائیلی حکومت میں اپنے ہم منصبوں پر واضح کر دیا ہے کہ یہ برطانوی پارلیمنٹیرینز کے ساتھ سلوک کرنے کا کوئی طریقہ نہیں اور ہم دونوں اراکین پارلیمنٹ سے رابطے میں ہیں اور اُن کو اپنی حمایت کا یقین دلایا ہے۔
وزیر خارجہ نے کہا کہ برطانوی حکومت کی توجہ غزہ میں جنگ بندی کی طرف واپسی، خونریزی کو روکنے، یرغمالیوں کی رہائی اور خطے میں تنازعے کے خاتمے کے لئے مذاکرات پر مرکوز ہے۔
Short Link: https://urdu.app.com.pk/urdu/?p=579050
