تہران ۔ 06 اکتوبر (اے پی پی) ایران کی مسلح افواج کے چیف آف اسٹاف جنرل محمد حسین باقری نے کہا ہے کہ اسرائیل خود کو مضبوط اور آہنی بنا کر پیش کر رہا ہے حالانکہ اس کی بنیادیں بالکل غیر مستحکم اورکمزورہیں۔ ایرانی خبر رساں ادارے کے مطابق مسلح افواج کے چیف آف اسٹاف جنرل محمد حسین باقری نے شہید حسین ہمدانی کی برسی کے موقع پر ایک اجتماع سے خطاب کرتے ہوئے کہا کہ شہید ہمدانی کی نگاہیں دشمن پر ہوتی تھیں اور انھوں نے دفاع مقدس اور شام کے محاذ پر نمایاں کارنامے انجام دیئے۔ جنرل محمد حسین باقری نے کہا کہ اسرائیل براہ راست اور امریکہ کے ذریعہ اسلامی ممالک میں عدم استحکام پیدا کرنے کی کوشش کر رہا ہے۔انہوں نے کہا کہ داعش نے اسرائیل کو بہت بڑی مدد فراہم کی جو کام اسرائیل نہیں کرسکتا تھا وہ داعش نے انجام دیا۔
