اسلام آباد۔29جولائی (اے پی پی):اسلام آباد ٹریفک پولیس کاوفاقی دارالحکومت میں تجارتی مراکز، مارکیٹس اور بڑی شاہراہوں میں غیر قانونی پارکنگ کے خلاف کریک ڈائون،رواں سال کے دوران 56ہزار سے زائد ڈرائیورزکیخلاف کارروائیاں عمل میں لائی گئیں،ٹریفک کے بہائو میں رکاوٹ بننے اور روڈ ڈسپلن کو متاثر کرنے والے ڈرائیورزکےخلاف بلا امتیازکارروائیاں جاری رہیں گی۔پولیس ترجمان کے مطابق انسپکٹر جنرل آف پولیس اسلام آباد سید علی ناصررضوی کے خصوصی احکامات کی روشنی میں اسلام آباد ٹریفک پولیس کا وفاقی دارالحکومت اسلام آباد میں ٹریفک کے بہائو کو برقرار رکھنے ، مربوط ٹریفک کے نظام کو مزید بہتر کرنے اورٹریفک قوانین پر عملدرآمد کو یقینی بنانے کیلئے خصوصی اقدامات جار ی ہیں۔ اس سلسلے میں اسلام آباد پولیس کا نو پارکنگ اورفٹ باتھ پر غیر قانونی پارکنگ کی خلاف ورزی کرنے والے ڈرائیورز کے خلاف بلا تفریق کارروائیوں کا سلسلہ جاری ہے۔
اسلام آباد ٹریفک پولیس نے وفاقی دارالحکومت کی مارکیٹس، تجارتی مراکز اور بڑی شاہراہوں میں غیر قانونی پارکنگ کیخلاف کریک ڈائون جاری رکھتے ہوئے سپیشل سکواڈ بھی تشکیل دئیے ہیں جنہوں نے رواں سال کے دوران 56ہزار سے زائدڈرائیورزکیخلاف بلاتفریق قانونی کارروائیاں عمل میں لاتے ہوئے متعددگاڑیوں کو مختلف تھانہ جات میں بند کیا۔ چیف ٹریفک آفیسراسلام آبادکیپٹن (ر)سید ذیشان حیدرنے تمام زونل ڈی ایس پیز کو خصوصی طورپرہدایات جاری کرتے ہوئے کہا کہ اسلام آباد میں ٹریفک قوانین کی خلاف ورزیوں کو کم کرنے کے لئے ٹریفک قوانین پر سختی سے عملدرآمد کو یقینی بنایا جائے اور ٹریفک کے بہائو میں رکاوٹ بننے والے عناصر خصوصاً جو ٹریفک ڈسپلن کو متاثر کرتے ہیں ان کے خلاف قانونی کارروائی کو مزید سخت اور موثر بنایا جائے۔ انہوں نے مزید کہا کہ تجارتی مراکزمیں پارکنگ کے لئے مختص جگہ پر پارکنگ کو یقینی بناتے ہوئے نوپارکنگ کی خلاف ورزی کرنے والوں کو رعایت نہ دی جائے،فٹ پاتھ پر پیدل چلنے والوں کا حق ہے فٹ پاتھ پر کسی قسم کی پارکنگ یا رکاوٹ برداشت نہیں کی جائے گی،شاپنگ سنٹرز میں آنے والے شہریوں کو ہر ممکن سہولیات فراہم کی جائیں گی،شہریوں سے اپیل ہے کہ وہ قانون کی پاسداری کرتے ہوئے اسلام آبادپولیس سے تعاون کریں تاکہ شہر میں مربوط ٹریفک کے نظام کو برقرار رکھتے ہوئے شہریوں کو حادثات سے محفوظ رکھا جا سکے۔
