اسپیکر قومی اسمبلی اسد قیصر کا استنبول میں رابطوں کے فروغ اور دہشتگری کے خاتمے کے موضوع پر منعقدہ تیسری اسپیکرز کانفرنس سے خطاب

اسلام آباد ۔ 12 اکتوبر (اے پی پی) سپیکر قومی اسمبلی اسد قیصر نے کہا ہے کہ پاکستان کشمیری عوام کے حق خودارادیت اور جدوجہد آزادی کی حمایت جاری رکھے گا‘پاکستان نے خطے میں دہشتگردی کے خلاف سب سے بڑی جنگ لڑی ہے اور دہشتگردی کے مکمل خاتمے تک یہ جنگ لڑتا رہے گا‘ عالمی برادری مقبوضہ کشمیر میں انسانی حقوق کی پامالیوں کا نوٹس لے، مقبوضہ جموں و کشمیر میں بھارت کی ریاستی دہشتگردی سے ایک خوف ناک انسانی المیہ جنم لے سکتا ہے۔ اسپیکر قومی اسمبلی اسد قیصر ترکی کے شہر استنبول میں رابطوں کے فروغ اور دہشتگری کے خاتمے کے موضوع پر منعقدہ تیسری اسپیکرز کانفرنس سے خطاب کررہے تھے۔کانفرنس میں ترکی ، افغانستان اور روس کے پارلیمنٹ کے اسپیکرز کے علاوہ چین کی نیشنل پیپلز کانگریس کے وائس اسپیکر نے بھی شرکت کی۔ اسپیکرز کانفرنس ایک ایسا پلیٹ فارم ہے جس کا پارلیمنٹ آف پاکستان نے 2017 میں اسلام آباد میں افتتاحی اجلاس کیاتھا۔کانفرنس کے افتتاحی اور اختتامی اجلاسوں سے خطاب کرتے ہوئے اسپیکر قومی اسمبلی نے مقبوضہ جموں وکشمیر میں بدترین صورتحال پر روشنی ڈالی۔ انہوں نے عالمی برادری سے مطالبہ کیا ہے کہ وہ مقبوضہ جموں و کشمیر میں موجودہ انسانی حقوق اور انسانی صورتحال کی نشاندہی کرنے کے ساتھ ساتھ کشمیریوں کے حق خود ارادیت کی حمایت جاری رکھے ۔ انہوں نے اس بات پر زور دیا کہ 5 اگست 2019 کو بھارت کی یکطرفہ اور غیر قانونی کارروائیوں اور اس کے بعد 8 لاکھ سے زیادہ کشمیریوں کی مسلسل ناکہ بندی ، علاقائی امن و سلامتی کے لئے ایک خطرہ ہے۔اسپیکر قومی اسمبلی نے اس عزم کا اعادہ کیا کہ دہشت گردی سے سب سے زیادہ متاثر ہونے کے ناطے ، پاکستان اس لعنت کو جڑ سے اکھاڑ پھینکنے کے لئے پرعزم ہے۔ پاکستان نے دہشت گردی کے خلاف جنگ میں بے شمار قربانیاں پیش کیں اور اس کے خلاف کامیابی حاصل کی۔رابطے کو علاقائی امن اور خوشحالی کا سنگ بنیاد قرار دیتے ہوئے اسپیکر نے فلیگ شپ چین پاکستان اقتصادی راہداری منصوبے کے تحت پاکستان کی طرف سے جاری پیشرفت پر روشنی ڈالی۔