اسلام آباد ۔ 6 فروری (اے پی پی) اسپیکر قومی اسمبلی اسد قیصر نے کہا ہے کہ پاکستان کا مستقبل ایک فعال، متحرک، باخبر اور باعمل پارلیمان سے ج±ڑا ہے اور یہی حقیقی جمہوریت کی اساس ہے۔ انہوں نے ان خیالات کا اظہار قومی اسمبلی سٹریٹیجک پلان اوور سائیٹ کمیٹی کے 5 سے 7 فروری کو مری میں ہونے والے اجلاس کی افتتاحی تقریب سے خطاب کرتے ہوئے کیا۔ اسپیکر نے تقریب میں سٹریٹجک پلان 2019۔2023 کی افتتاحی تقریب میں شرکت کرنے والوں کا شکریہ ادا کرتے ہوئے کہا کہ آپ سب کی شمولیت ہمارے اِس مشترکہ یقین کا مظہر ہے کہ قومی اداروں کے فروغ اور ترویج کے لئے ہم سب پارٹی وابستگیوں سے بالاتر ہو کر مکمل اتفاقِ رائے سے قدم سے قدم ملا کر چلنے کو تیار ہیں۔ انہوں نے کہا کہ سیاسی سوجھ بوجھ اور مدبرانہ اندازِ فکر کی یہ انتہائی احسن مثال ہے۔ انہوں نے کہا کہ سٹریٹیجک پلان کی تشکیل ہم سب کے لئے انتہائی اہم ہے کیونکہ یہ آنے والے پانچ سالوں کے لیے قومی اسمبلی جیسے سپریم آئینی ادارے کی سمت کا تعین کرے گا، اس کے ذریعے ہم بامقصد اور مفید قانون سازی، متحرک اور فعال قائمہ کمیٹیوں، جامع پارلیمانی سفارتکاری، دورِ جدید سے ہم آہنگ تکنیکی صلاحیت اور اعلیٰ تحقیق جیسے مقاصد کے حصول کو ممکن بنا سکتے ہیں۔ انہوں نے چودھویں قومی اسمبلی کی طرف سے جامع سٹریٹجک پلان 2014-18وضع کرنے پر اس کی خدمات کو سراہا۔ انہوں نے کہا کہ یہ ا±سی پلان کی کامیابی تھی کہ اسمبلی میں گرین پارلیمنٹ، ایس ڈی جیز سیکرٹریٹ کا قیام، پپس جیسے ادارے کو مضبوط بنانا، لیجسلیٹو ڈرافٹنگ کونسل کے قیام اوران ہاو¿س ٹریننگ کے پروگراموں جیسے کامیاب اقدامات کئے گئے۔ انہوں نے اس یقین کا اظہار کیا کہ سٹریٹجک پلان کمیٹی2019۔2023 کے ممبران کی مشترکہ کاوشیں ہمیں قوم کے سامنے سرخرو کریں گی۔ اسد قیصر نے کہا کہ بطور اسپیکر اپنے انتخاب کے بعد انہوں نے ویمنز پارلیمنٹری کاکس، ینگ پارلیمنٹرینز فورم اور پارلیمنٹری فرینڈشپ گروپس جیسے فورمز کو از سرِ نو متحرک کرنے پر خصوصی توجہ دی۔ انہوں نے مزید کہا کہ مجھے خوشی ہے کہ کاکس کی تنظیمِ نو ہو چکی ہے اور محترمہ منزہ حسن کی قیادت میں یہ تمام پارلیمانی گروپوں کو ساتھ لے کر چل رہا ہے، اب تک 94 فرینڈشپ گروپ قائم کر دیئے گئے ہیں اور اِن کی ابتدائی میٹنگز شروع ہو چکی ہیں اور عنقریب ینگ پارلیمنٹیرین فورم کے انتخابات بھی پپس کے تعاون سے منعقد کئے جا رہے ہیں۔ انہوں نے سٹریٹجک پلان 2019-2023کے ممبران کو یقین دلایا کہ پارلیمنٹ کو مستحکم بنانے کے لئے آپ کی طرف سے متفقہ طور پر جو اقدامات بھی تجویز کیے گئے ا±نہیں میرا مکمل اعتماد حاصل ہو گا اور اِنہیں پایہ تکمیل تک پہنچانا قومی اسمبلی سیکرٹریٹ کی اولین ذمہ داری ہو گی۔ انہوں نے اس عزم کا اظہار کیا کہ ہم کام کرنے کے روایتی اور پرانے انداز سے نکل کر مزید پیشہ ورانہ اور جدید ماحول میں اپنی اسمبلی کوآگے لے کر جائیں گے۔ انہوں نے کہا کہ اس کمیٹی کو تشکیل دیتے وقت ان کے پیشِ نظر سیاسی یا جماعتی وابستگی نہیں بلکہ آپ سب ارکان کا وسیع تجربہ، علم اور بصیرت تھی لہذا مجھے پورا یقین ہے کہ آپ کی صلاحیتیں ہم سب کے مشترکہ نصب العین کے لیئے بھرپور طریقے سے استعمال ہوں گی۔ اسپیکر نے اس تقریب کے انعقاد میں فراخدلانہ تعاون پر ویسٹ منسٹر فاو¿نڈیشن فار ڈیمو کریسی کا بھی شکریہ ادا کیا۔ تقریب میں شیر علی ارباب، مہناز اکبر عزیز، ریاض فتیانہ، احسن اقبال چودھری، سید نوید قمر، محترمہ عندلیب عباس، محترمہ عائشہ غوث پاشہ، منزہ حسن، شاہدہ اختر علی اور مریم اورنگزیب سمیت قومی اسمبلی کے اعلی افسران نے شرکت کی۔
