اسلام آباد۔19فروری (اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی نے کہا ہے کہ الیکشن کمیشن کی جانب سے کامیاب امیدواروں کی فہرست جاری ہونے کے بعد وزارت پارلیمانی امور قومی اسمبلی کا اجلاس طلب کرنے کی سمری نگران وزیراعظم کو بھجوائے گی اور صدر مملکت سے قومی اسمبلی کا اجلاس طلب کرنے کی درخواست کی جائے گی۔
پیر کو یہاں میڈیا سے گفتگو کرتے ہوئے وفاقی وزیر اطلاعات نے کہا کہ نگران حکومت نے اپنی ذمہ داری پوری کی ہے، کمشنر راولپنڈی کے معاملہ پر اعلیٰ تحقیقاتی کمیٹی بنی ہے جبکہ الیکشن کمیشن بھی اس معاملہ پر کارروائی کر رہا ہے۔ انہوں نے کہا کہ ہمیں اپنے اداروں اور نظام پر اعتماد کرنا چاہئے۔ انہوں نے کہا کہ قانونی عمل چل رہا ہے تو انتظار کرنا چاہئے۔
قومی اسمبلی کا اجلاس طلب کرنے کے حوالے سے سوال کے جواب میں وفاقی وزیر اطلاعات نے کہا کہ آئین اور قانون کے تحت جیسے ہی الیکشن کمیشن کامیاب امیدواروں کی فہرست جاری کرے گا، وزارت پارلیمانی امور قومی اسمبلی کا اجلاس طلب کرنے کی سمری نگران وزیراعظم کو بھجوائے گی اور صدر مملکت سے قومی اسمبلی کا اجلاس طلب کرنے کی درخواست کی جائے گی۔
