امریکی ٹیرف میں اضافہ اب معاشی معنی نہیں رکھتا ، چین

بیجنگ ۔17اپریل (اے پی پی):چین نے کہا ہے کہ امریکی ٹیرف میں اضافہ اب معاشی معنی نہیں رکھتا ہے ۔ شنہوا کے مطابق چین کی وزارت خارجہ کے ترجمان نے جمعرات کو کہا کہ چین کی بعض مصنوعات پر امریکا کی طرف سے 245 فیصد ٹیرف اب معاشی معنی نہیں رکھتا۔

ترجمان نے نشاندہی کی کہ چین نے یہ بات بالکل واضح کر دی ہے کہ چین پر امریکی ٹیرف میں اضافہ ایک نمبر گیم بن گیا ہے، جس سے معاشی طور پر اب کوئی زیادہ فرق نہیں پڑتا، سوائے اس کے کہ امریکا دوسروں کو مجبور کرنے اور دھونس دینے کے لئے ٹیرف کو ہتھیار بناتا ہے۔

انہوں نے کہاکہ چین ایسی جنگیں لڑنا چاہتا ہے نہ ہی امریکا سے ڈرتا ہے ۔ ترجمان نے کہا کہ ٹیرف اور تجارتی جنگوں کا کوئی فاتح نہیں ہوتا۔انہوں نے مزید کہاکہ اگر امریکا ٹیرف کے ساتھ نمبروں کا یہ کھیل کھیلتا رہتا ہے، تو اسے محض نظر انداز کر دیا جائے گا۔ لیکن اگر امریکا چین کے حقوق اور مفادات کو حقیقی نقصان پہنچانا جاری رکھتا ہے، تو چین پُرعزم جوابی اقدامات کے ساتھ جواب دے گا ۔

Short Link: https://urdu.app.com.pk/urdu/?p=583231