اسلام آباد؍جن منگ۔20جون (اے پی پی):وزارت خارجہ کے ایڈیشنل سیکرٹری (ایشیا پیسیفک) عمران احمد صدیقی نے اقوام متحدہ کے چارٹر کے مقاصد اور اصولوں کے تحت کثیرالجہتی کے لئے پاکستان کے غیر متزلزل عزم پر زور دیتے ہوئے اس بات کا اعادہ کیا ہے کہ امن و ترقی ایک مستحکم اور خوشحال خطے کی تعمیر کے لئے باہمی طور پر مضبوط ستون ہیں۔ وزارت خارجہ کی طرف سے جاری بیان کے مطابق ان خیالات کا اظہار انہوں نے جمعہ کو کن منگ میں چھٹے چین۔جنوبی ایشیا تعاون فورم سے خطاب میں کیا۔
فورم کی میزبانی پر چین کی قیادت کو سراہتے ہوئے عمران احمد صدیقی نے کہا کہ بیلٹ اینڈ روڈ انیشیٹو (بی آر آئی) کے تحت اعلیٰ معیار کی ترقی جس کی مثال چین پاکستان اقتصادی راہداری (سی پی ای سی) کے فلیگ شپ منصوبے سے ملتی ہے، نے خطے کے سماجی اور اقتصادی منظرنامے کو تبدیل کردیا ہے۔ جامع اور پائیدار ترقی کی اہم ضرورت پر روشنی ڈالتے ہوئے ایڈیشنل سیکرٹری نے پاکستان کے ترقیاتی وژن کا خاکہ پیش کیا جو علاقائی رابطوں میں اضافہ، سمندری وسائل کے پائیدار استعمال، موسمیاتی لچک اور تکنیکی جدت پر مبنی ہے۔
انہوں نے اس بات پر زور دیا کہ خطے میں دیرپا علاقائی امن کا قیام دیرینہ تنازعات کو حل کئے بغیر خاص طور پر غیر ملکی قبضے والے علاقوں میں حاصل نہیں کیا جاسکتا۔ انہوں نے علاقائی تعاون کی بنیاد کے طور پر پرامن بقائے باہمی کے پانچ اصولوں پر عمل پیرا ہونے پر زور دیا جو خود مختاری اور علاقائی سالمیت، عدم جارحیت، عدم مداخلت، مساوات اور تنازعات کے پرامن حل پر مرکوز ہیں۔
جنوبی ایشیا کے مستقبل کی تشکیل میں ابھرتی ہوئی ٹیکنالوجیز کے کردار کا ذکر کرتے ہوئے انہوں نے ڈیجیٹل انفراسٹرکچر، مصنوعی ذہانت اور جدت کی قیادت میں ترقی میں زیادہ تعاون پر زور دیا۔ انہوں نے موسمیاتی تبدیلی سے نمٹنے، قدرتی آفات کی تیاری اور مشترکہ آبی وسائل کے مشترکہ انتظام کے لئےمربوط علاقائی کوششیں کرنے کی ضرورت پر زور دیا اور پانی کو ہتھیار بنانے کی یکطرفہ کوششوں کے خلاف خبر دار کیا۔
ایڈیشنل سیکرٹری نے چائنا ساؤتھ ایشیا ڈیولپمنٹ فورم کے قیام کی تجویز بھی پیش کی جو خطے میں مشترکہ خوشحالی اور جامع ترقی کو آگے بڑھانے کے لئے ترجیحی شعبوں میں عملی تعاون کو آگے بڑھانے کے لیے ایک اعلیٰ سطحی طریقہ کار کے طور پر کام کرسکتا ہے۔
 عمران احمد صدیقی کا چھٹے چین۔جنوبی ایشیا تعاون فورم سے خطاب){kind=link}