اسلام آباد۔5اکتوبر (اے پی پی):انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی) میں یونائیٹڈ سٹیٹس انسٹی ٹیوٹ آف پیس (یو ایس آئی پی) کے تعاون سے ”خطے میں امن اور سلامتی اور اس سے آگے: پاکستان کا کردار“ کے موضوع پر دو روزہ بین الاقوامی کانفرنس جمعرات کو شروع ہوگئی۔ دو روزہ بین الاقوامی کانفرنس میں دنیا بھر سے ماہرین تعلیم اور ماہرین شرکت کررہے ہیں۔
کانفرنس کے مختلف متنوع ورکنگ سیشنز میں افغانستان، مشرق وسطیٰ، پاکستان امریکہ دو طرفہ تعلقات، انسداد دہشت گردی، علاقائی امن و سلامتی کے ساتھ ساتھ غیر روایتی سکیورٹی چیلنجز شرکاءنے اظہار خیال کیا ۔اس موقع پر پاکستان کے نمائندہ خصوصی برائے افغانستان آصف درانی مہمان خصوصی تھے۔
افتتاحی سیشن میں یو ایس آئی پی کے ایشیا سنٹر کے نائب صدر ڈاکٹر اینڈریو وائلڈر، سابق سیکرٹری خارجہ اور ڈائریکٹر جنرل آئی ایس ایس آئی سہیل محمود اور آمنہ خان نے بھی خطاب کیا۔ سفیر سہیل محمود نے اپنے خطاب میں کہا کہ دنیا کو اس وقت پولرائزیشن اور تنازعات کے خطرات کی انتہائی سطح کا سامنا ہے، روایتی اور غیرروایتی سمیت مختلف سکیورٹی خطرات نے عالمی سطح پر خطرات میں اضافہ کیا ہے ۔
انہوں نے کہا کہ دنیا اس وقت بڑے چیلنجوں سے دوچار ہے جن میں بڑی طاقتوں کا مقابلہ، جاری جنگیں، دہشت گردی، وبائی امراض کے اثرات، معاشی بدحالی اور موسمیاتی تبدیلی شامل ہیں۔ ان تبدیلیوں کا نتیجہ غیر یقینی ہے۔ انہوں نے جنوبی ایشیا اور اس سے آگے کی جیو سٹریٹجک اور اقتصادی تبدیلی اور علاقائی چیلنجز کا بھی ذکر کیا ۔ انہوں نے کہا کہ افغانستان سے امریکی انخلاء کے بعد سلامتی کے خطرات برقرار ہیں، مشرق وسطیٰ میں ایک اہم تبدیلی دیکھی جا رہی ہے۔ ایران اور سعودی عرب کے درمیان چین کی ثالثی میں ہونے والی مفاہمت کے علاقائی اثرات مرتب ہورہے ہیں۔
سابق سیکرٹری خارجہ نے کہا کہ مشرق وسطیٰ اصلاحات سے گزر رہا ہے، جیو پولیٹکس اور معاشیات کو نئی شکل دے رہا ہے، جو گرین انشیٹو، تجارت، سرمایہ کاری اور رابطے کے ذریعے ممکن ہورہا ہے، اس کے برعکس جنوبی ایشیا تاریخ اور تلخ ماضی میں پھنسا ہوا ہے جو مفاہمت، تنازعات کے پرامن حل، علاقائی تعاون اور روابط کے ساتھ ساتھ اقتصادی انضمام کی طرف بڑھنے سے قاصر ہے۔ انہوں نے کہا کہ ’ہندوتوا‘ نظریے کے خطرناک اثرات بھارت کی اندرونی بنیادوں کو ہلا رہے ہیں اور جنوبی ایشیا میں امن و سلامتی کے لیے خطرات کو بڑھا رہے ہیں۔
پاکستان اور امریکہ کے بارے میں بات کرتے ہوئے سہیل محمود نے دونوں شراکت داروں کے درمیان دیرینہ دوستی پر زور دیا۔ انہوں نے کہا کہ بدلتے ہوئے ماحول میں تعلقات کے لیے نئے، مستحکم ستونوں کو تلاش کرنا تیزی سے اہم ہوتا جا رہا ہے جو پاکستان کے اقتصادی ترقی کے اہداف کو آگے بڑھانے اور علاقائی اور بین الاقوامی سطح پر امن و سلامتی کے لیے مثبت کردار ادا کر سکیں۔ انہوں نے کہا کہ پاکستان کو اس پیچیدہ اور تیزی سے بدلتے ہوئے عالمی اور علاقائی ماحول کو آگے بڑھانا چاہیے کیونکہ یہ اپنے طور پر ایک اہم ریاست ہے، ایک درمیانی طاقت کے طور پر پاکستان کے پاس علاقائی اور بین الاقوامی امن، سلامتی اور خوشحالی کے لیے بہت زیادہ مثبت کردار ادا کرنے کی صلاحیت اور امکانات دونوں ہیں، پاکستان کا کام پیچیدہ جغرافیائی سیاست کو سنبھالنا اور جیو اکنامکس کے محور پر زور دینا ہے۔
یو ایس آئی پی کے ایشیا سنٹر کے نائب صدر ڈاکٹر اینڈریو وائلڈر نے اس موقع پر خطاب کرتے ہوئے کہا کہ امن پر توجہ مرکوز کرنے اور سلامتی کو ترجیح دینے میں بہت زیادہ وقت صرف ہوتا ہے، دنیا کمزور اور ٹوٹے ہوئے کثیر جہتی نظام کے ساتھ بہت سے سنگین خطرات اور چیلنجز کے ساتھ تیزی سے بدلتے ہوئے اور پریشان کن دور سے گزر رہی ہے، دنیا اب بھی کوویڈ وبائی امراض کے دیرپا اثرات، روس اور یوکرین کے بحران سے چین اور امریکہ کے درمیان بڑھتے ہوئے تنائو اور موسمیاتی تبدیلی سے لاحق وجودی خطرات سے دوچار ہے۔
افغانستان کے بارے میں پاکستان کے خصوصی نمائندہ آصف درانی نے اپنے خطاب میں کہا کہ پاکستان تین بڑے خطوں جنوبی ایشیا، وسطی ایشیا اور مشرق وسطیٰ کے سنگم پر ہے، اس جغرافیائی ترتیب نے پاکستان کے لیے چیلنجز میں اضافہ کردیا ہے جس میں بھارت کے ساتھ تعلقات بھی شامل ہیں،افغانستان میں بدلتی ہوئی صورتحال میں پاکستان کا کردار کلیدی بن جاتا ہے، پاکستان نے دہشت گردی کے خلاف امریکی جنگ میں فرنٹ لائنز پر ہونے کی وجہ سے بہت زیادہ جانی نقصان برداشت کیا ہے جسے عالمی برادری نے مکمل طور پر نظر انداز کردیا۔
انہوں نے کہا کہ بھارت کے ساتھ بارہا کشیدگی، افغانستان کے ساتھ مشکل تعلقات اور ایران پر پابندیوں کی وجہ سے خطے میں تجارت متاثر ہوئی ہے، پاکستان اور افغانستان کے درمیان ایک علامتی رشتہ ہے اور تعلقات میں مشکل پیچیدگیوں کے باوجود دونوں ممالک ماضی میں مختلف معاملات پر ایک دوسرے کے ساتھ مضبوط کے ساتھ کھڑے رہے ہیں۔ انہوں نے کہا کہ بین الاقوامی برادری اور دنیا کے لیے یہ ضروری ہے کہ وہ افغانستان میں طاقت کی موجودہ تقسیم کو نظر انداز نہ کرے اور اسے سمجھے اور مصالحتی اقدامات پر کام کرے تاہم سب سے اہم نکتہ افغانوں کے لیے یہ سمجھنا ہے کہ افغانستان کے استحکام کی کلید ان کے پاس ہے، جب تک وہ افغانستان میں حالات کو معمول پر نہیں لاتے پاکستان سمیت کوئی بھی بیرونی ملک کچھ نہیں کرسکتا۔
خصوصی نمائندہ آصف درانی نے کہا کہ پاکستان میں تحریک طالبان پاکستان (ٹی ٹی پی) کے کسی بھی خطرے کو بے اثر کردیا جائے گا۔ انہوں نے کہا کہ اس وقت پاکستان میں سکیورٹی کے مسائل موجودہ معاشی پریشانیوں میں اضافہ کر رہے ہیں تاہم متعدد محاذوں پر چیلنجز کے باوجود پاکستان دہشت گردی کے خلاف رفتار کو برقرار رکھے ہوئے ہے اور لچک اور عزم کے ساتھ آگے بڑھ رہا ہے۔ افتتاحی سیشن سے انسٹی ٹیوٹ آف سٹریٹجک سٹڈیز اسلام آباد کی آمنہ خان نے بھی خطاب کیا۔
