ہرارے۔23جون (اے پی پی):آئی سی سی مینز کرکٹ ورلڈ کپ کے کوالیفائر رائونڈ میں کانٹے دار مقابلوں کا سلسلہ زمبابوے میں جاری ہے ۔کوالیفائر رائونڈ میں کل(ہفتہ کو) مزید دو میچ کھیلے جائیں گے پہلا میچ میزبان زمبابوے اور دو بار کی عالمی چیمپئن ویسٹ انڈیز کی ٹیموں کے درمیان ہرارے سپورٹس کلب ، ہرارے میں کھیلا جائے گا۔زمبابوے کی ٹیم کو کریگ ارون لیڈ کر رہے ہیں جبکہ ویسٹ انڈیز کی ٹیم شائی ہوپ کی زیر قیادت میدان میں اترے گی۔
پوائنٹس ٹیبل پر ویسٹ انڈیز کی ٹیم گروپ اے میں 4 پوائنٹس کے ساتھ ٹاپ پر ہےجبکہ زمبابوے کی ٹیم کے بھی 4 پوائنٹس ہیں۔ اسی روز دوسرا میچ نیدرلینڈز اور نیپال کی ٹیموں کے درمیان تاکاشینگا سپورٹس کلب، ہرارےمیں کھیلا جائے گا۔ نیدرلینڈز کی ٹیم کو سکاٹ ایڈورڈز لیڈ کر رہے ہیں جبکہ نیپال کی ٹیم کو روہت پاوڈیل لیڈ کر رہے ہیں۔ پوائنٹس ٹیبل پر گروپ اے میں شامل نیدرلینڈز اور نیپال کی ٹیمیوں کے دو، دو پوائنٹس ہیں اور بالترتیب تیسرے اور چوتھے نمبر پر موجود ہیں۔
رواں سال شیڈول ورلڈ کپ میں جگہ بنانے کے لئے 10 ٹیمیں کوالیفائر میں مدمقابل ہیں ۔ سابق ورلڈ چیمپئنز ویسٹ انڈیز اور سری لنکا کی ٹیمیں بھی براہ راست ورلڈ کپ کیلئے کوالیفائی نہ کر سکیں۔ وہ بھی کوالیفائر میچز میں پنجہ آزمائی کر رہی ہیں۔ ویسٹ انڈیز، زمبابوے، نیدرلینڈز، نیپال اور یو ایس اے کی ٹیموں کو گروپ اے میں ہیں ۔
سری لنکا، آئرلینڈ، سکاٹ لینڈ، اومان اور یو اے ای گروپ بی کا حصہ ہیں ۔ کوالیفائر میچز 9 جولائی تک زمبابوے میں کھیلے جائیں گے۔ واضح رہے پہلی مرتبہ کوالیفائر کے سپر سکس مرحلے میں ڈی آر ایس کا استعمال کیا جا رہا ہے۔
