اسلام آباد۔21ستمبر (اے پی پی):پاکستان فرنیچر کونسل کے چیف ایگزیکٹو آفیسر میاں کاشف اشفاق نے کہا ہے کہ پاکستان کی فرنیچر کی صنعت اپنے جدید ڈیزائنوں کے بل پر عالمی منڈیوں میں جگہ بنانے کی بڑی صلاحیت رکھتی ہے ، یہ برآمدات میں نمایاں کردار ادا کر سکتی ہے مگر برآمدبڑھانے کے لیے مراعات اور سہولیات کے پیکج کی اشد ضرورت ہے۔
بدھ کو اپنے بیاں میں انہوں نے کہا کہ لکڑی کا کام کرنے والے کاریگروں کی جدید خطوط پر تربیت کے لیے وفاقی اور صوبائی حکومتوں کی خصوصی توجہ ،برآمدات کو بڑھانے کے لیے نئی بین الاقوامی مارکیٹیں تلاش کرنے کی اشد ضرورت ہے کیونکہ پاکستانی مصنوعات میں بہت زیادہ پوٹینشل ہے۔
انہوں نے کہا کہ اگر چہ فرنیچر کی برآمدات کم ہیں لیکن اس کا آغاز ہو چکا ہے اور اب اس شعبے میں جارحانہ مارکیٹنگ کی حکمت عملی کے ساتھ برآمدات مختصر مدت میں دوگنا ہو سکتی ہیں۔ انہوں نے تاجروں پر زور دیا کہ وہ پاکستان میں مقامی صنعت کے فروغ کے لیے دل لگا کر کام کریں، قدرت نے پاکستان کو وافر وسائل سے نوازا ہے اور ہمارے لوگ بہترین مہارتوں سے آراستہ ہیں جو ملک کو جدید خطوط پر استوار کرنے کی پوری اہلیت رکھتے ہیں۔
انہوں نے فرنیچر بنانے والی قومی اور بین الاقوامی معروف کمپنیوں کے ساتھ اپنے کام کی نمائش کرنے والے نوجوان ڈیزائنرز اور آرکیٹیکٹس کے شاندار کام کو سراہا۔ میاں کاشف اشفاق نے کہا کہ پی ایف سی فرنیچر اور انٹیریئر ڈیزائننگ کے شعبے سے وابستہ پاکستان کے نوجوان کاروباری افراد کی مدد کے لیے پرعزم ہے جن کی اختراعی سوچ بڑی اقتصادی خوشحالی کی راہ ہموار کرنے کی صلاحیت رکھتی ہے۔ انہوں نے کہا کہ نمائشیں نوجوان ڈیزائنرز اور آرکیٹیکٹس کو مارکیٹ کے رجحانات کا جائزہ لینے اور بڑے پیشہ ور افراد کے ساتھ اپنے کام کی نمائش کرنے کے مواقع فراہم کرتی ہیں۔
