اسلام آباد ۔ 10 جولائی (اے پی پی) وفاقی وزیر ریلوے شیخ رشید احمد نے کہا ہے کہ ایم ایل ون منصوبے پر کام کا آغاز بڑی کامیابی ہو گی، منصوبے کی آئندہ 15 روز تک ایکنک سے منظوری لے لی جائے گی، منصوبے پر 90 فیصد پاکستانی ہنرمند افرادی قوت ہو گی، صرف 10 فیصد لوگ چین سے آئیں گے، انگریز 1861 کلومیٹر ٹریک چھوڑ کر گیا جو ایک انچ آگے نہیں بڑھا، ملکی تاریخ میں پہلی مرتبہ 1872 کلومیٹر فاسٹ ٹریک پر کام ہونے جا رہا ہے جو وزیراعظم عمران خان، میری اور لیفٹیننٹ جنرل (ر) عاصم سلیم باجوہ کی کوششوں سے ممکن ہونے جا رہا ہے۔ ان خیالات کا اظہار انہوں نے جمعہ کو وزارت ریلوے میں پریس کانفرنس سے خطاب کرتے ہوئے کیا۔ شیخ رشید احمد نے کہا کہ چیف جسٹس اف پاکستان نے یہ کیس سنا میں سمجھتا ہوں کہ یہ فیصلہ بھی اس حوالے سے اہمیت رکھتا ہے، ایکنک سے انشاءاﷲ 15 روز تک اس منصوبے کی منظوری لے لی جائے گی۔ وزیر ریلوے نے کہا کہ ایم ایل ون کے ذریعے 1872 کلومیٹر ٹریک چین کے تعاون سے بچھایا جائے گا جس پر کوئی کراسنگ نہیں ہو گی۔ انہوں نے کہا کہ کنسٹرکشن کے عمل میں ڈیڑھ سے دو لاکھ لوگوں کو روزگار ملے گا اور چین کے ساتھ ہونے والے معاہدے کے تحت صرف 10 فیصد انجینئر اور ماہرین چین سے آئیں گے جبکہ 90 فیصد افراد پاکستان سے ہوں گے جس میں ریلوے سے ریٹائر ہونے والے بھی کام کر سکتے ہیں۔ انہوں نے کہا کہ اس وقت ایم ایل ون منصوبے کے علاوہ ہمارے پاس کوئی حل نہیں 160 کلومیٹر فی گھنٹہ کا ٹریک میسر آئے گا جسے بعد میں 200 کلومیٹر فی گھنٹہ تک لے جایا جا سکتا ہے۔9 ارب ڈالر کا یہ فقید المثال منصوبہ ریلوے میں انقلاب لائے گا اسی کو ہم بلٹ ٹرین میں بھی بدل سکیں گے، موجودہ 80 کلومیٹر ٹریک کو بروئے کار نہیں لایا جا سکتا، جو اچھی حالت کی پٹڑیاں ہوں گی انہیں ایم ٹو، تھری اور فور اور چھوٹے ٹریک پر منتقل کر دیں گے۔ انہوں نے کہا کہ ایم ایل ون کلیدی منصوبہ ہوگا جس کے ذریعے ریلوے کو نیا ٹریک، نئی بوگیاں اور نئی زندگی ملے گی۔ شیخ رشید احمد نے کہا کہ نالہ لئی پر بھی اسی دور میں کام ہو گا۔ ریلوے ٹریک بھی بچھے گا اور ایکسپریس وے بھی بنائیں گے۔ اس موقع پر انہوں نے میڈیا کے سوالات کے بھی جواب دیئے اور راولپنڈی کے عوام سے اپیل کی کی حکومت کے اعلان کردہ ایس او پیز پر عمل کرتے ہوئے عیدالاضحی منائیں خود بھی محفوظ رہیں اور دوسروں کو بھی محفوظ بنائیں۔
