اسلام آباد۔12اگست (اے پی پی):نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (این ای او سی) نے ملک کے مختلف علاقوں میں ممکنہ بارشوں کے پیش نظر دریاؤں اور شہری علاقوں میں سیلابی صورتحال کا الرٹ جاری کر دیا۔ ترجمان این ڈی ایم اے کے مطابق دریائے سندھ، چناب، راوی اور ستلج میں پانی کے بہاؤ میں اضافہ متوقع ہے جبکہ تونسہ، گڈو، مرالہ، خانکی اور قادرآباد پر نچلے سے درمیانے درجے کے سیلاب کا خدشہ ظاہر کیا گیا ہے۔نالہ ایک، پلکھو، ڈیک، ہڈیارہ، بین اور بسنتر میں درمیانے سے اونچے درجے کے بہاؤ کا امکان ہے۔ مون سون بارشوں کے نتیجے میں تربیلا ڈیم 96 فیصد اور منگلا ڈیم 64 فیصد تک بھر چکے ہیں۔ محکمہ موسمیات کے مطابق اسلام آباد، راولپنڈی، گوجرانوالہ، لاہور، سیالکوٹ، سرگودھا، فیصل آباد، ملتان اور خانیوال میں 13 سے 15 اگست تک وقفہ وقفہ سے بارش کا امکان ہے جبکہ ساہیوال، لودھراں، مظفرگڑھ، کوٹ ادو، تونسہ، بہاولپور، ڈیرہ غازی خان، راجن پور اور رحیم یار خان میں درمیانی سے تیز بارشیں متوقع ہیں۔
پنجاب کے بڑے شہروں میں شہری سیلاب کا خدشہ ہے جبکہ ڈی جی خان اور راجن پور میں پہاڑی ندی نالوں میں طغیانی اور پیر پنجال کے نالوں میں بہاؤ میں اضافے کا امکان ہے۔ خیبر پختونخوا کے اضلاع چترال، دیر، سوات، کالام، کوہستان، مالاکنڈ، بونیر، مانسہرہ، بٹگرام، ایبٹ آباد، ہری پور، صوابی، مردان، پشاور، چارسدہ، کوہاٹ اور ہنگو میں بارش اور آندھی کی پیشگوئی کی گئی ہے۔ دریائے کابل، سوات اور ان کے ملحقہ نالوں پنجکوڑا، بارہ اور کلپانی میں بھی پانی کے بہاؤ میں اضافہ متوقع ہے۔ادارہ نے خبردار کیا ہے کہ خیبر پختونخوا میں ممکنہ شدید بارشوں کے باعث اچانک سیلاب اور پہاڑی علاقوں میں لینڈ سلائیڈنگ کا خدشہ ہے۔ گلگت بلتستان کے اضلاع ہنزہ، شگر اور گانچھے میں بھی بارشوں اور گلیشئرز کے پگھلنے کے باعث دریائے ہنزہ، خنجراب، شمشال، برالدو، ہوشے اور سالتورو میں پانی کے بہاؤ میں اضافہ متوقع ہے۔ عوام کو دریاؤں اور ندی نالوں کے قریب محتاط رہنے، سرکاری وارننگز پر عمل کرنے اور حساس علاقوں میں انخلا کے لیے تیار رہنے کی ہدایت کی گئی ہے۔ این ڈی ایم اے تمام متعلقہ اداروں کے ساتھ مکمل رابطے میں ہے اور صورتحال کی پیشگی آگاہی فراہم کر رہا ہے۔
