ایچ ای سی کا فیکلٹی لیڈرشپ اینڈ مینجمنٹ ایکسیلینس کے عنوان سے کانفرنس کا انعقاد

اسلام آباد۔18جون (اے پی پی):ہائر ایجوکیشن کمیشن (ایچ ای سی) پاکستان نے بدھ کو نیشنل آؤٹ ریچ پروگرام کی کامیابی کو اجاگر کرنے کے لئے فیکلٹی لیڈرشپ اینڈ مینجمنٹ ایکسیلینس کے عنوان سے ایک کانفرنس کا انعقاد کیا۔ اس کیپسٹی بلڈنگ پروگرام کے تحت نیشنل اکیڈمی آف ہائر ایجوکیشن نے 85 پبلک سیکٹر یونیورسٹیوں میں 4000 سے زائد فیکلٹی اور انتظامی عملے کے ارکان کو تربیت دی۔ چیئرمین سینیٹ سید یوسف رضا گیلانی کانفرنس کی اختتامی تقریب کے مہمان خصوصی تھے جبکہ وفاقی وزیر برائے وفاقی تعلیم و پیشہ وارانہ تربیت خالد مقبول صدیقی نے ابتدائی تقریب میں شرکت کی۔ گورنر بلوچستان شیخ جعفر خان مندوخیل نے بھی پاکستان بھر سے وائس چانسلرز کی ایک بڑی اسمبلی کے ساتھ کانفرنس میں شرکت کی۔

یہاں یہ بات قابل ذکر ہے کہ نیشنل اکیڈمی آف ہائر ایجوکیشن نے ہائر ایجوکیشن ڈویلپمنٹ ان پاکستان جو کہ ایچ ای سی کے تعاون سے عالمی بینک کی مالی اعانت سے چلنے والا منصوبہ ہے ،کے تحت نیشنل آؤٹ ریچ پروگرام کے فلیگ شپ اقدام کو ڈیزائن کیا ۔ اس پروگرام کا مقصد اعلیٰ معیار کی پیشہ وارانہ ترقی کو براہ راست پاکستان بھر کے یونیورسٹی کیمپس تک پہنچانا، رسائی اور اثر کو یقینی بنانا تھا۔نیشنل آؤٹ ریچ پروگرام کے تحت نیشنل اکیڈمی آف ہائر ایجوکیشن نے مجموعی طور پر 66 فیکلٹی ٹریننگ پروگرامز اور 45 مینجمنٹ ٹریننگ پروگرامز کا انعقاد کیا۔ اس کے علاوہ خواتین کو بااختیار بنانے اور مینٹرشپ پروگرام کے تحت 18 خواتین یونیورسٹیوں میں تین ماہ کے پائلٹ مینٹرشپ پروگرام منعقد کئے گئے۔

کانفرنس سے خطاب کرتے ہوئے چیئرمین سینیٹ نے اعلیٰ تعلیمی اداروں کی استعداد کار میں اضافے کا کلچر بنانے اور مضبوط کرنے پر ایچ ای سی، این اے ایچ ای اور ایچ ای ڈی پی کو سراہا۔ انہوں نے قوم کی تعمیر میں اکیڈمیا کے کردار پر روشنی ڈالتے ہوئے کہا کہ فیکلٹی ممبران مستقبل کے معمار ہیں جبکہ یونیورسٹی کے نمائندے ترقی کے وژن اور جستجو کو آگے بڑھاتے ہیں۔ انہوں نے قوم کی ترقی میں تعلیم کے کردار پر زور دیتے ہوئے کہا کہ تعلیم ہی وہ بنیاد ہے جس پر قوموں کی تعمیر ہوتی ہے۔ انہوں نے اس بات پر زور دیا کہ قوم کو مقصد کے اتحاد، قیادت میں ہمت اور تعلیم کی تبدیلی کی طاقت پر یقین کے ساتھ آگے بڑھنا چاہئے۔ انہوں نے خواتین کو بااختیار بنانے اور رہنمائی کے پروگرام کی بھی تعریف کی اور کہا کہ پاکستان اس وقت تک اپنی مکمل صلاحیتوں تک نہیں پہنچ سکتا

جب تک کہ تمام خواتین کو ملک کی سماجی و اقتصادی ترقی میں اپنا کردار ادا کرنے کی رسائی حاصل نہ ہو۔ انہوں نے مزید کہا کہ خواتین کو بااختیار بنانے اور رہنمائی کا پروگرام میرے دل کے بہت قریب ہے۔کانفرنس سے خطاب کرتے ہوئے وفاقی وزیر خالد مقبول صدیقی نے کانفرنس کا حصہ بننے پر خوشی کا اظہار کیا۔ انہوں نے تعلیم کی اہمیت پر زور دیتے ہوئے اس بات پر زور دیا کہ ملک کی موجودہ اور مستقبل کی ضروریات سے ہم آہنگ تعلیمی نظام وقت کی ضرورت ہے۔ انہوں نے ملک کی سماجی و اقتصادی ترقی میں مہارت پر مبنی تعلیم کی اہمیت کو بھی اجاگر کیا۔ گورنر بلوچستان مندوخیل نے اپنے خطاب میں اس بات پر زور دیا کہ یونیورسٹیوں کے درمیان تعاون سے قومی یکجہتی اور خودمختاری کو تقویت ملے گی۔

انہوں نے کہا کہ اپنی طاقتوں کو بروئے کار لا کر ہم اپنی آنے والی نسلوں کے محفوظ مستقبل کو یقینی بنا سکتے ہیں۔ چیئرمین ایچ ای سی ڈاکٹر مختار احمد نے کہا کہ پاکستان کے اعلیٰ تعلیم کے شعبے کو چیلنجز اور مواقع دونوں کا سامنا ہے۔ انہوں نے چیلنجوں کا مقابلہ کرنے اور مواقع سے فائدہ اٹھانے کے لئے ایک بصیرت علمی قیادت، موثر ادارہ جاتی نظم و نسق، اور تعلیمی فضیلت کے لئے مضبوط عزم کی ضرورت پر زور دیا۔چیئرمین نے اس بات پر زور دیا کہ پاکستان کی بقا تعلیم، تحقیق اور جدت طرازی میں مضمر ہے۔ انہوں نے اعلیٰ تعلیم میں نمایاں سرمایہ کاری کو اہمیت دینے کی ضرورت پر زور دیا تاکہ تعلیمی ادارے زیادہ موثر انداز میں پاکستان کی سربلندی میں اپنا کردار ادا کر سکیں۔پراجیکٹ کوآرڈینیٹر ایچ ای ڈی پی اویس احمد اور منیجنگ ڈائریکٹر نیشنل اکیڈمی آف ہائر ایجوکیشن ڈاکٹر نور آمنہ ملک نے بھی کانفرنس سے خطاب کیا۔