راولپنڈی ۔8فروری (اے پی پی):اینٹی نار کاٹکس اتھارٹی(اے این ایف)نے 5 مختلف کارروائیوں میں ایک کروڑ روپے سے زائد مالیت کی 18.866 کلو گرام منشیات برآمد کر کے 4 ملزمان کو گرفتار کر لیا۔ اینٹی نارکوٹکس فورس (اے این ایف) ترجمان نے کہا ہے کہ ملک کے مختلف شہروں میں منشیات سمگلنگ کے خلاف کریک ڈاؤن جاری ہے، 5 مختلف کارروائیوں میں 4 ملزمان گرفتار کئے گئے ہیں جبکہ ایک کروڑ روپے سے زائد مالیت کی 18.866 کلو گرام منشیات بھی برآمد کی گئی ہیں۔
انہوں نے کہا کہ اسلام آباد انٹرنیشنل ایئرپورٹ پر جدہ جانے والے مسافر کے کپڑوں میں جذب شدہ 9.478 کلو گرام آئس برآمد کی گئی ہے ۔ اسی طرح اسلام آباد ایئرپورٹ پر دوسری کاروائی میں دبئی جانے والے مسافر کے جوتوں میں چھپائی گئی 354 گرام چرس برآمد کر لی گئی۔ مزید برآں راولپنڈی میں واقع کوریئر آفس کے ذریعے بحرین بھیجے جانے والے پارسل سے کچن کے سامان میں چھپائی گئی 934 گرام آئس برآمد کی گئی ہے۔
ترجمان اے این ایف نے مزید کہا کہ جھنگ میں ملوموڑ کے قریب گاڑی کے خفیہ خانوں میں چھپائی گئی 8 کلو ہیروئن برآمد کر کے ملزم کو گرفتار کیا گیا ہے جبکہ ڈیرہ اسماعیل خان میں شیخ یوسف چوک کے قریب ملزم کے قبضے سے 100 گرام چرس برآمد کی گئی ہے۔ انہوں نے کہا کہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
Short Link: https://urdu.app.com.pk/urdu/?p=557391
