برآمدات میں اضافے کیلئے جدید ریسرچ اور اختراع ناگزیر ہے، سردار طاہر محمود

اسلام آباد۔5جنوری (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) کے صدر سردار طاہر محمود نے اس بات پر زور دیا ہے کہ معیاری پیداوار کو بڑھانے، مسابقت کو بہتر بنانے اور برآمدات کا عالمی ویلیو چینز میں پائیدار مقام حاصل کرنے کے لیے تحقیق پر مبنی اختراعی نظام ناگزیر ہے۔پیر کے روز اسلام آباد چیمبر آف کامرس کی جانب سے جاری بیان کے مطابق ان خیالات کا اظہار انہوں نے نوجوان تاجروں کے ایک گروپ سے گفتگو کرتے ہوئے کیا جنہوں نے آئی سی سی آئی میں ان سے ملاقات کی۔

آئی سی سی آئی کے صدر نے کہا کہ آج کی علم سے چلنے والی عالمی معیشت میں وہ کاروبار جو تحقیق، مصنوعات کی ترقی، اختراعات اور ٹیکنالوجی کو اپنانے میں سرمایہ کاری کرتے ہیں اور صارفین کی ترجیحات کو پورا کرنے کے لیے بہتر پوزیشن میں ہیں۔سردار طاہر محمود نے اس بات پر زور دیا کہ پاکستانی برآمد کنندگان کو روایتی طریقوں سے آگے بڑھ کر نئی منڈیاں تلاش کرنے کے لیے ویلیو ایڈیشن، کمپلائنس، برانڈنگ اور جدت پر مبنی پیداوار پر توجہ دینی چاہیے۔

انہوں نےکہاکہ تحقیق پر مبنی فیصلہ سازی اور اختراع اب اختیاری نہیں رہی، یہ ایسی اشیاء تیار کرنے کے لیے ضروری ہیں جو بین الاقوامی معیارات پر پورا اتریں اور مارکیٹ کے تقاضوں کو پورا کریں۔انہوں نے صنعت، تعلیمی اداروں اور تحقیقی اداروں کے درمیان مضبوط روابط کی ضرورت پر روشنی ڈالی تاکہ اس بات کو یقینی بنایا جا سکے کہ جدت کو حقیقی مارکیٹ کی ضروریات کے ساتھ ہم آہنگ کیا جائے۔ انہوں نے نوجوان کاروباری افراد کی اپلائیڈ ریسرچ، سٹارٹ اپس اور اختراعی آئیڈیاز کی کمرشلائزیشن میں زیادہ سے زیادہ شمولیت پر زور دیا تاکہ برآمدات پر مبنی ترقی کو آگے بڑھایا جا سکے۔

آئی سی سی آئی کے صدر نے اس بات کا اعادہ کیا کہ چیمبر صلاحیت سازی کے پروگراموں، انڈسٹری اکیڈمیا ڈائیلاگ اور پالیسی ایڈووکیسی کے ذریعے سازگار ماحول کو فروغ دینے کے لیے پرعزم ہے جس کا مقصد پاکستان کی برآمدات کو بڑھانا ہے۔ انہوں نے نوجوان کاروباریوں کو یقین دلایا کہ آئی سی سی آئی کاروباری برادری میں انٹرپرینیورشپ، ریسرچ کلچر اور مسابقت کو فروغ دینے والے اقدامات کی حمایت جاری رکھے گا۔نوجوان تاجروں نے آئی سی سی آئی کے فعال کردار کو سراہا اور جدت پر مبنی کاروباری ماڈلز تیار کرنے کے لیے چیمبر کے ساتھ تعاون کرنے میں گہری دلچسپی کا اظہار کیا جو پاکستان کی اقتصادی ترقی اور برآمدی تنوع میں کردار ادا کر سکتے ہیں۔