ماریشس افریقہ کا اسٹریٹجک گیٹ وے، پاکستانی سرمایہ کار مواقع سے فائدہ اٹھائیں، ہائی کمشنرمنصور کرمبیکس

اسلام آباد۔8جون (اے پی پی):پاکستان میں ماریشس کے ہائی کمشنر منصور کرمبیکس نے پیر کو اسلام آباد چیمبر آف کامرس اینڈ انڈسٹری (آئی سی سی آئی) کا دورہ کیا جہاں انہوں نے دو طرفہ تجارت، سرمایہ کاری اور اقتصادی تعاون کو مضبوط بنانے کے مواقع پر تبادلہ خیال کرنے کے لیے چیمبر کی قیادت اور کاروباری برادری کے اراکین کے ساتھ ایک نتیجہ خیز بات چیت کی۔اجتماع سے خطاب کرتے ہوئے ہائی کمشنر نے وفاقی دارالحکومت کی اعلیٰ کاروباری نمائندہ تنظیم کے طور پر آئی سی سی آئی کے کردار کو سراہا اور تجارت اور صنعت کے فروغ کے لیے اس کی خدمات کی تعریف کی۔ انہوں نے کہا کہ وہ دنیا بھر کے ممالک کے ساتھ کاروباری روابط کو فروغ دینے کے لیے آئی سی سی آئی کی قیادت کے عزم اور فعال انداز سے بہت متاثر ہوئے ہیں۔ماریشس کی اقتصادی صلاحیتوں پر روشنی ڈالتے ہوئے سفیر نے اپنے ملک کو ایک بڑی معیشت اور افریقہ کے لیے ایک سٹریٹجک گیٹ وے قرار دیا۔ انہوں نے تجارت، سرمایہ کاری، سیاحت اور مہمان نوازی کے شعبوں میں ماریشس میں موجود وسیع امکانات کو ظاہر کیا اور پاکستانی تاجروں کو ان شعبوں میں مواقع تلاش کرنے کی ترغیب دی۔

انہوں نے مشترکہ منصوبوں کے قیام، بزنس ٹو بزنس (بی ٹو بی) روابط کو فروغ دینے اور دونوں ممالک کے درمیان بے پناہ اقتصادی صلاحیت کو کھولنے کے لیے تجارتی وفود کے تبادلوں کی اہمیت پر زور دیا۔ہائی کمشنر نے مشاہدہ کیا کہ ماریشس اور پاکستانی کاروباری اداروں کے درمیان مشترکہ منصوبے نہ صرف دوطرفہ اقتصادی تعلقات کو مضبوط کریں گے بلکہ فریقین کو وسیع تر علاقائی اور بین الاقوامی منڈیوں تک رسائی کے قابل بنائیں گے۔ انہوں نے پاکستان کو ایک پرامن ملک قرار دیا جو انتہائی مہمان نواز، دوستانہ اور خوش آمدید کہنے والے لوگوں کا وطن ہے اور اس یقین کا اظہار کیا کہ مضبوط تجارتی روابط دونوں ممالک کے درمیان دیرینہ تعلقات کو مزید تقویت بخشیں گے۔رابطوں میں تسلسل کی ضرورت پر زور دیتے ہوئے انہوں نے تجویز پیش کی کہ سفارتی برادری اور کاروباری شعبے کے درمیان اس طرح کی بات چیت سال میں کم از کم دو بار ہونی چاہیے تاکہ ان ملاقاتوں سے سامنے آنے والے فیصلوں اور تجاویز کی موثر پیروی اور عمل درآمد کو یقینی بنایا جا سکے۔

آئی سی سی آئی کے صدر سردار طاہر محمود نے معزز مہمان کا خیرمقدم کرتے ہوئے کہا کہ ماریشس افریقہ کے ساتھ پاکستان کی مصروفیات میں ایک منفرد اور خصوصی مقام رکھتا ہے، یہ واحد افریقی ملک ہے جس کے ساتھ پاکستان کا ترجیحی تجارتی معاہدہ (پی ٹی اے) ہے۔ انہوں نے کہا کہ خوشگوار تعلقات اور کافی مواقع کے باوجود دوطرفہ تجارت اپنی حقیقی صلاحیت سے بہت نیچے ہے اور اس کے لیے سرکاری اور نجی دونوں شعبوں سے زیادہ کوششوں کی ضرورت ہے۔آئی سی سی آئی کے صدر نے کہا کہ چیمبر ماریشس کے معروف چیمبرز آف کامرس اور کاروباری انجمنوں کے ساتھ مفاہمت کی یادداشت (ایم او یو) پر دستخط کرنے کا خواہاں ہے تاکہ تاجروں، سرمایہ کاروں اور کاروباری رہنمائوں کے درمیان براہ راست بات چیت کی سہولت فراہم کی جاسکے۔ انہوں نے اس امید کا اظہار کیا کہ ہائی کمشنر کا دورہ پاکستان اور ماریشس کے درمیان اقتصادی تعاون، سرمایہ کاری کی شراکت داری اور باہمی طور پر فائدہ مند تجارتی تعلقات کے نئے باب کا آغاز ہو گا۔آئی سی سی آئی کے سابق صدر اور سفارتی امور سے متعلق آئی سی سی آئی کی قائمہ کمیٹی کے چیئرمین ظفر بختاوری نے ماریشس کو ’’بحر ہند کا موتی‘‘ قرار دیتے ہوئے اس اعتماد کا اظہار کیا کہ موجودہ ہائی کمشنر کے دور میں دونوں ممالک کے درمیان دو طرفہ تعلقات میں نمایاں ترقی ہوگی۔

انہوں نے ریمارکس دیئے کہ سفیر کا جذبہ، خلوص اور اپنے ملک کی ترقی کے لیے عزم ان کے خیالات کو بامعنی نتائج میں تبدیل کرنے کے عزم کی عکاسی کرتا ہے۔ انہوں نے ہائی کمشنر کو پاکستان اور ماریشس کے درمیان تجارت، سرمایہ کاری اور عوام کے درمیان رابطوں کو آگے بڑھانے میں آئی سی سی آئی کے مکمل تعاون کا یقین دلایا۔انٹرایکٹو سیشن میں آئی سی سی آئی کے نائب صدر عرفان چوہدری، ایگزیکٹو ممبران عبدالرحمٰن صدیقی، ذوالقرنین عباسی، وسیم چوہدری، ملک عبدالعزیز، عمران منہاس اور شمائلہ صدیقی، سابق سینئر نائب صدر خالد چوہدری، آئی سی سی آئی کی قائمہ کمیٹی برائے آسیان کے چیئرمین چوہدری محمد علی سمیت کاروباری شخصیات کی بڑی تعداد نے شرکت کی۔