کوئٹہ۔23اپریل (اے پی پی):وزیرِ اعظم شہباز شریف نے ہدایت کی ہے کہ بلوچستان میں حکومت کی طرف سے اشیا ضروریہ کی رعایتی نرخوں فراہمی رمضان کے بعد بھی جاری رکھی جائے۔ یہ ہدایت انہوں نے ہفتہ کو اشیاءِ ضروریہ کی قیمتوں اور یوٹیلٹی اسٹورز پر ان کی بلا تعطل فراہمی کے حوالہ سے منعقدہ اجلاس میں دی۔ اجلاس میں وفاقی وزراء احسن اقبال، طارق بشیر چیمہ، مخدوم مرتضیٰ محمود، وزیرِاعلیٰ بلوچستان میر عبدالقدوس بزنجو، چیف سیکرٹری بلوچستان، وفاقی و صوبائی اعلی افسران نے شرکت کی۔
بلوچستان میں اشیاءِ ضروریہ کی حکومت کے مقرر کردہ نرخوں سے زیادہ قیمت میں فروخت اور فراہمی میں تعطل کی شکایت پر وزیرِاعظم کے نوٹس کے بعد ہنگامی بنیادوں پر وفاقی وزیرِ غذائی تحفظ اور وفاقی وزیرِ صنعت کو کوئٹہ روانہ کیا گیا تاکہ کسی بھی قسم کی ممکنہ پریشان کن صورتحال سے بر وقت بچا جا سکے۔
اجلاس میں وزیرِاعظم کو تفصیلی طور پر آگاہ کیا گیا کہ گزشتہ رات کے اقدامات کے بعد مسائل کو حل کر لیا گیا ہے، نہ صرف آج سے آٹے کی فراہمی شروع کر دی گئی ہے بلکہ یہ یقینی بنایا گیا ہے کہ پورے بلوچستان میں یہ فراہمی بلاتعطل جاری رہے۔ مزید بتایا گیا کہ گزشتہ رات وفاقی وزیرِ صنعت مخدوم مرتضیٰ محمود کے دورے کے دوران یوٹیلٹی سٹور پر چینی اور گھی کے سٹاک طلب کے اعتبار کے کافی پائے گئے جبکہ آٹے کا مسئلہ حل ہونے کے بعد تمام اشیاء ضروریہ وزیرِاعظم کے اعلان کردہ رعایتی نرخوں پر دستیاب ہیں۔
وزیرِاعظم نے ان اقدامات کو سراہتے ہوئے ہدایت کی کہ یہ یقینی بنایا جائے کہ یہ سبسڈی بلاتعطل لوگوں تک پہنچتی رہے۔ وزیرِاعظم نے بلوچستان میں اس پیکیج کی ضرورت کو محسوس کرتے ہوئے ہدایت کی کہ پیکیج کو رمضان تک محدود رکھنے کی بجائے اسے صوبے میں بعد میں بھی جاری رکھا جائے۔ اس حوالے سے وزیرِاعظم نے متعلقہ افسران کو ہدایات جاری کیں کہ اس پر ہنگامی بنیادوں پر کام کیا جائے۔
