لاہور۔8جون (اے پی پی):چیئرمین متحدہ علما بورڈ پنجاب حافظ محمد طاہر محمود اشرفی نے کہا ہے کہ سب سے بڑی دہشت گردی توہین رسالتﷺہے، ایک مسلمان سب کچھ برداشت کر سکتا ہے لیکن ناموس رسالتﷺ پر کسی قسم کا سمجھوتا نہیں کر سکتا،بھارت میں نبی کریمﷺ ۖ کی شان میں گستاخی پر بھارتی مصنوعات کا مکمل بائیکاٹ کیاجانا چاہیے، بھارتی حکومت واقعہ پرسرکاری سطح پر معافی مانگے اور ملعون گستاخ کے خلاف قانونی کارروائی کی جائے،10 جون کو یوم حرمت رسولﷺۖمنایاجائیگا۔
انہوں نے ان خیالات کا اظہارپنجاب انسٹیٹیوٹ آف قرآن اینڈ سیرت سینٹر، اپر مال سکیم لاہور میں پریس کانفرنس سے خطاب کرتے ہوئے کیا۔حافظ طاہر محمود اشرفی نے کہاکہ بھارتی حکمران پارٹی کے نمائندوں کی جانب سے توہین رسالتۖ کی پرزور مذمت کرتے یں،عالم اسلام نے خاص کر مشرق وسطی و اسلامی دنیا میں شدید ردعمل کا اظہار کیا ہے،قطر، کویت، ایران، عمان،یو اے ای ودیگر اسلامی ممالک نے شدید مذمت کی ہے، ان مسلم ممالک کے عوام نے احتجاجا بھارتی مصنوعات کو سٹورز سے باہر کوڑے دانوں میں پھینک دیا ہے،اس وقت مشرق وسطی و اسلامی دنیا میں بہت سخت ردعمل آیا ہے۔
انہوں نے کہا کہ مسلمان ہر چیز برداشت کرسکتے ہیں لیکن توہین رسالتﷺ کو برداشت نہیں کر سکتے، پاکستان کے تمام مکاتب فکر اس بات پر متفق ہیں جب تک بھارتی حکومتی ملعون مجرموں کو سزا اور سرکاری سطح پرمعافی نہیں مانگتی بھارتی مصنوعات کا مکمل بائیکاٹ کیاجائے۔
طاہر اشرفی نے کہا کہ سب سے بڑی دہشت گردی ناموس رسالتﷺ ۖ کی توہین ہے، نبی پاکﷺ ۖ کی گستاخی کرنے والوں کو عالمی مجرم قرار دیا جائے اور ملعون گستاخ کے خلاف قانونی کارروائی کی جائے۔
انہوں نے کہاکہ گستاخ رسولﷺ ۖ پر مسلم حکمرانوں میں سب سے پہلے وزیر اعظم محمدشہباز شریف کا مذمتی بیان سامنے آیا، پاکستان کا ہر مسلمان اور غیر مسلم یوم حرمتۖ پر ہمارے ساتھ ہیں،بھارتی حکومت سرکاری طورپر معافی نہیں مانگتی تو اس کا بائیکاٹ کیاجائیگا۔
طاہر اشرفی نے کہا کہ10 جون کو پوری دنیا میں یوم حرمت رسولﷺ ۖ منایاجائے گا،احتجاجی مظاہرے و جلسے جلوسوں میں پر امن انداز سے احتجاج کریں گے،فتنہ فساد پھیلانے والوں سے عوام کو ہوشیار رہنے کی ضرورت ہے۔انہوں نے کہاکہ ہم تحریک انصاف کا حصہ نہیں تھے ہماری جماعت تو متحدہ علما بورڈ ہے،اسلامو فوبیا کے خلاف جدوجہد کرکے کیس او آئی سی میں لے کر گئے۔
اس موقع پر علامہ محمد اکبر،عبد الوہاب روپڑی،ڈاکٹر رمضان سیالوی اورمولانا محمد خان لغاری نے بھی خطاب کیا اور کہا کہ جمعہ کے روز یوم احتجاج یوم حرمت رسول ﷺ ۖ کے طورپر منائیں گے، بھارت کشمیر اور مسلمانوں پر جو ظلم کررہاہے اس پر دنیا نے بھارت کا بائیکاٹ کیاہے تو ہمیں بھی بھارتی مصنوعات کا بائیکاٹ کرنا چاہیے،بھارت سے کسی قسم کی تجارت نہیں ہونی چاہیے۔
انہوں نے کہاکہ ہمیں ہر چیز سے زیادہ ناموس رسالت ۖ عزیز ہے ، بھارت نے گستاخی کرکے خطے میں بدامنی کی کوشش کی ہے اس لیے احتجاج کے دوران سرکاری یا پرائیویٹ املاک کو نقصان نہ پہنچائیں،جمعہ کے روز اہلیان پر امن احتجاج کریں اور بھارتی مصنوعات کا بائیکاٹ کریں،احتجاج اس وقت جاری رہے گا جب تک بھارتی حکومت معافی اور مجرموں کو سزا نہیں دے دیتی ہے۔
Short Link: https://urdu.app.com.pk/urdu/?p=311226
