اسلام آباد۔3ستمبر (اے پی پی):بھارتی ناظم الامور کو دفتر خارجہ طلب کرکے بھارتی قابض افواج کی جانب سے حریت پسند کشمیری رہنما سیّد علی شاہ گیلانی کی میت سے بے رحمانہ اور غیرانسانی سلوک پر شدید احتجاج کیا گیا۔
جمعہ کو ترجمان دفتر خارجہ کے مطابق بھارتی ناظم الامور کو پاکستانی مؤقف سے آگاہ کرتے ہوئے بتایا گیا کہ بھارتی قابض افواج کی جانب سے سیّد علی شاہ گیلانی کی میت ان کے خاندان سے چھیننے اور ان کی مرضی کے مطابق ان کی تدفین کی اجازت نہ دینے کا شرمناک عمل بین الاقوامی انسانی قوانین، شہری اور انسانی حقوق کے تمام اصولوں کی صریحاً خلاف ورزی ہے۔
بھارتی ناظم الامور پر زور دیا گیا کہ ہندوستان کو کسی بھی ایسے غلط اقدام سے باز رہنا چاہئے جو علاقائی امن کو مزید خطرے میں ڈال دے۔ ناظم الامور کو پاکستان کے مستقل موقف کی یاد دہانی کرائی گئی کہ بھارتی حکومت کو فوری طور پر مقبوضہ کشمیر میں غیر قانونی فوجی محاصرہ ختم کرنا چاہئے، مقبوضہ علاقے کے آبادیاتی ڈھانچے کو تبدیل کرنے کے اقدامات سے باز آنا چاہئے ، 9 لاکھ سے زائد قابض فوج کو واپس بلانا چاہئے اور انسانی حقوق کی تمام خلاف ورزیوں کو فوری طور پر ختم کرنا چاہئے۔
بھارتی ناظم الامور کو پاکستان کے اصولی مؤقف سے آگاہ کیا گیا کہ خطہ میں پائیدار امن اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق تنازعہ جموں و کشمیر کے پرامن حل میں مضمر ہے۔
