مقبوضہ بیت المقدس ۔ 3 نومبر (اے پی پی) مسجد الاقصی کے خطیب نے بیت المقدس میں اذان پر پابندی عائد کئے جانے کی مذمت کی ہے۔رپورٹ کے مطابق مسجد الاقصی کے خطیب شیخ عکرمہ صبری نے اسرائیلی حکومت کی نسل پرستانہ پالیسیوں کی مذمت کرتے ہوئے اس بات پر زور دیا کہ اذان ایک اسلامی عمل ہے جس کی آواز، قیامت تک بیت المقدس کی فضا میں گونجتی رہے گی۔ واضح رہے کہ بدھ کو بیت المقدس کے اسرائیلی علاقوں کے میئر نے اسرائیلی پولیس اہکاروں سے بقول ان کے اذان سے ہونے والے شور کو ختم کرنے کی درخواست کی تھی۔ واضح رہے کہ اس اقدام کے لئے اسرائیلی ذرائع ابلاغ نے مدتوں سے ماحول بنا رکھا تھا۔ صیہونی ذرائع ابلاغ نے دعوی کیا تھا کہ صبح کی اذان سے غاصب صیہونی آباد کاروں کو تکلیف پہنچتی ہے۔
