بین شیلٹن کا بڑا اپ سیٹ، دفاعی چیمپئن کارلوس الکاراز یو ایس اوپن ٹینس مینزسنگلزمقابلے سے باہر

نیویارک۔9ستمبر (اے پی پی):امریکی ٹینس سٹار بین شیلٹن نے سنسنی خیز اور طویل مقابلے کے بعد دفاعی چیمپئن کارلوس الکاراز کو شکست دے کر یو ایس اوپن ٹینس مینز سنگلز مقابلوں کے سیمی فائنل میں جگہ بنالی ۔ بی بی سی کے مطابق رواں سال کے چوتھے اور آخری گرینڈ سلام یو ایس اوپن ٹینس ٹورنامنٹ کے دلچسپ مقابلے امریکا کے شہر نیویارک میں جاری ہیں جن میں شائقین ٹینس کو کانٹے دار مقابلے دیکھنے کو مل رہے ہیں۔آرتھر ایش سٹیڈیم میں کھیلے گئے مردوں کے سنگلز مقابلوں کے کوارٹر فائنل میچ میں 23 سالہ میزبان ٹینس سٹار بین شیلٹن اور 23 سالہ ہسپانوی ٹینس سٹار اور میگا ایونٹ کے دفاعی چیمپئن کارلوس الکاراز آمنے سامنے تھے۔

بین شیلٹن نے 4 گھنٹے 28 منٹ جاری رہنے والے اعصاب شکن مقابلے میں دفاعی چیمپئن کارلوس الکاراز کو 7-6(7-5)،1-6، 3-6، 6-1اور 6-7(7-10)سے نہ صرف شکست دی بلکہ میگا ایونٹ کا بڑا اپ سیٹ کرتے ہوئے سیمی فائنل کے لئے بھی کوالیفائی کرلیا۔ یہ میچ یو ایس اوپن کی تاریخ میں سب سے دیر سے ختم ہونے والا میچ بن گیا۔ میچ کا آغاز رات 11 بجے کے بعد ہوا جبکہ ہزاروں شائقین آخری گیند تک آرتھر ایش سٹیڈیم میں موجود رہے اور بین شیلٹن کی بھرپور حوصلہ افزائی کرتے ہوئے ’’یو ایس اے، یو ایس اے‘‘ کے نعرے لگاتے رہے۔

اس شکست کے ساتھ ہسپانوی ٹینس کھلاڑی کارلوس الکاراز کی گرینڈ سلام مقابلوں میں مسلسل 18 فتوحات کا سلسلہ بھی ختم ہوگیا۔ کارلوس الکاراز اپریل کے بعد پہلی مرتبہ کسی ٹورنامنٹ میں شریک ہوئے اور دائیں کلائی کی انجری سے صحت یابی کے بعد کھیل رہے تھے۔بین شیلٹن کی ایک سروس کی رفتار 146 میل فی گھنٹہ تک بھی پہنچی ۔بین شیلٹن اب سیمی فائنل میں ہم وطن فرانسس ٹیافو کا سامنا کریں گے جنہوں نے اس سے قبل ہم وطن ایلکس مشیلسن کو شکست دے کر سیمی فائنل میں جگہ بنائی تھی۔بین شیلٹن اس کامیابی کے ساتھ اپنے کیریئر کے تیسرے گرینڈ سلام سیمی فائنل میں پہنچ گئے ہیں۔ وہ اس سے قبل 2023 کے یو ایس اوپن اور 2025 کے آسٹریلین اوپن میں بھی آخری 4 میں جگہ بنا چکے ہیں۔

کارلوس الکاراز کے اخراج کے بعد رواں یو ایس اوپن میں ٹائٹل کا دفاع کرنے کی ان کی امیدیں بھی ختم ہوگئیں۔ 2004 سے 2008 تک راجر فیڈرر کے مسلسل 5 یو ایس اوپن ٹائٹل جیتنے کے بعد سے کوئی بھی مرد کھلاڑی اس اعزاز کا دفاع نہیں کرسکا۔دوسری جانب بین شیلٹن جو فلوریڈا یونیورسٹی کے سابق قومی چیمپئن اور سال کے بہترین کھلاڑی رہ چکے ہیں، یو ایس اوپن جیت کر 1984 میں جان میک اینرو کے بعد کسی گرینڈ سلام کا ٹائٹل جیتنے والے پہلے سابق کالج کھلاڑی بننے کی کوشش کریں گے۔