ڈی جی پی ایس بی کا کھلاڑیوں کی فلاح و بہبود اور کھیل کے فروغ کے لیے رضوان آفتاب کے کردار کا اعتراف

اسلام آباد۔24اکتوبر (اے پی پی):پاکستان اسپورٹس بورڈ (پی ایس بی) کے ڈائریکٹر جنرل یاور حسین نے اکٹیوٹ کے چیف ایگزیکٹو آفیسر اور نیشنل ہسپتال ڈی ایچ اے لاہور کے ڈائریکٹر آر ڈی رضوان آفتاب احمد کو کھیلوں کی سرگرمیوں کے فروغ اور پاکستان کے ممتاز کھلاڑیوں کی بھرپور سرپرستی کرنے پر شیلڈ اور بلیزر آف ایکسی لینس سے نوازا ہے۔ ڈی جی پی ایس بی نے حال ہی میں اسپورٹس فیلانتھروپسٹ اور اسپورٹس میڈیکل پروفیشنل رضوان آفتاب احمد سے ملاقات کے دوران اسپانسرشپ، طبی و غذائی معاونت اور کھیلوں کی تنظیموں کے ساتھ شراکت داری کے ذریعے ملک میں کھیلوں کی ترقی کے لیے ان کی کاوشوں کو سراہا۔ انہی کوششوں کے سلسلے میں اکٹیوٹ نے حال ہی میں پاکستان اسپورٹس بورڈ کوچنگ سینٹر لاہور کے ڈائریکٹر کے ساتھ ایک سمجھوتے کی یادداشت پر دستخط کیے ہیں۔ ڈی جی پی ایس بی یاور حسین نے اگست 2026ء میں پی ایس بی سینٹر لاہور میں جشنِ آزادی کی تقریبات کے انعقاد میں ان کے تعاون اور اسپانسرشپ کو خصوصی طور پر سراہا۔ انہوں نے کہا کہ اس معاہدے کی بنیادی توجہ کھیلوں کے فروغ، کھلاڑیوں کی معاونت اور پاکستان میں کھیلوں کے مواقع کو مضبوط بنانے کے لیے ممکنہ مشترکہ اقدامات پر مرکوز ہے۔ ملاقات میں کھیلوں کے مقابلوں اور کھلاڑیوں کی تربیت و ترقی کے لیے نجی شعبے کی شمولیت کی اہمیت پر بھی تبادلہ خیال کیا گیا۔ ڈی جی پی ایس بی کا کہنا تھا کہ رضوان آفتاب احمد کا تعاون متعدد کھیلوں تک پھیلا ہوا ہے، جس میں قومی اسپورٹس فیڈریشنز کی نمائندگی کرنے والے اور ملکی و بین الاقوامی سطح پر حصہ لینے والے کھلاڑیوں کی سرپرستی شامل ہے۔رضوان آفتاب نے پاکستان باڈی بلڈنگ فیڈریشن کے زیر اہتمام ایک بین الاقوامی باڈی بلڈنگ مقابلے کی اسپانسرشپ میں بھی دلچسپی کا اظہار کیا ہے، جسے اکٹیوٹ فٹنس چیلنج کے مجوزہ نام سے منعقد کیا جائے گا۔ اس ایونٹ کا مقصد اسٹرینتھ ٹریننگ اور فٹنس کو فروغ دینا ہے تاکہ کھلاڑیوں کو بین الاقوامی سطح پر مقابلہ کرنے کا بہترین پلیٹ فارم میسر آسکے۔کھیلوں کے فروغ میں نمایاں خدمات کے اعتراف میں ڈائریکٹر جنرل پاکستان اسپورٹس بورڈ اور پاکستان باڈی بلڈنگ فیڈریشن کی جانب سے رضوان آفتاب احمد کو یادگاری شیلڈ اور بلیزر آف ایکسی لینس پیش کیا گیا۔ایونٹ اسپانسرشپ کے علاوہ رضوان آفتاب مختلف کھیلوں سے وابستہ کھلاڑیوں کو طبی، غذائی اور مالی معاونت فراہم کرنے میں بھی پیش پیش رہے ہیں۔ اکٹیوٹ کے توسط سے ان کاوشوں میں مقابلوں کی تیاری کے دوران کھلاڑیوں کی دیکھ بھال اور ضروری وسائل تک رسائی بہتر بنانا شامل ہے۔