پشاور۔ 29 اپریل (اے پی پی):ٹرانس پشاور نے مسافروں کی سہولت کے پیش نظربس سروس کے اوقات کار میں توسیع کر دی ہے۔تر جمان کے مطابق نئے اوقات کار کے مطابق تین روٹس پر شام کے اوقات میں سروس کے دورانیے میں اضافہ کر دیا گیا ہے، ان میں DR-13 (سردار گڑھی تا پبی)، DR-14 (بورڈ تا ریگی ماڈل ٹاؤن) اور DR-14A (بورڈ تا پروفیسر ماڈل ٹاؤن) روٹ شامل ہیں۔ توسیع کے بعد پبی روٹ پر سردار گڑھی سے آخری بس شام 6 بج کر 15 منٹ کی بجائے 7 بج کر 30 منٹ پر روانہ ہوگی جبکہ پبی ٹرمینل سے آخری بس شام 7 کی بجائے 8بج کر 15 منٹ پر روانہ ہو گی۔ اسی طرح ناصر باغ روڈ کے دونوں روٹس پر آخری بس شام 7 بج کر 15 منٹ کی بجائے شام 7 بج کر 30 منٹ پر روانہ ہوگی۔
اس توسیع سے پبی روٹ پر 5 اضافی بسیں جبکہ ناصر باغ روڈ کے دونوں روٹس پر ایک ایک اضافی بس چلائی جائے گی۔اوقات کار میں توسیع کا فیصلہ موسم گرما کے آغاز کے ساتھ شام کے وقت مسافروں کی بڑھتی ہوئی تعداد کو مدنظر رکھتے ہوئےکیا گیا ہے۔ترجمان نے کہا کہ ٹرانس پشاور مسافروں کی آرا اور ضروریات کو مدنظر رکھتے ہوئے سروسز میں بہتری کے لیے پُرعزم ہے۔ مزید معلومات کے لیے مسافر زو موبائل ایپ، سوشل میڈیا پلیٹ فارمز یا ہیلپ لائن سے رابطہ کر سکتے ہیں۔
Short Link: https://urdu.app.com.pk/urdu/?p=589318
