دبئی ۔ 15 جنوری (اے پی پی) بابر اعظم انٹرنیشنل کرکٹ کونسل (آئی سی سی) کی تازہ ترین ٹیسٹ پلیئرز رینکنگ میں ٹاپ رینکڈ پاکستانی بلے باز بن گئے، انہوں نے 5 درجے ترقی کے ساتھ کیریئر بہترین 20ویں پوزیشن حاصل کر لی ہے، اسد شفیق ایک سیڑھی چڑھ کر 23ویں نمبر پر آ گئے، اظہر علی تنزلی کے بعد ٹاپ ٹونٹی سے باہر ہو گئے، ہاشم آملہ کی 3 درجے ترقی کے ساتھ ٹاپ ٹین اور ڈی کوک کی 12 درجے ترقی کے ساتھ ٹاپ ٹونٹی میں واپسی ہوئی ہے، باﺅلرز میں ڈونے اولیویئر کیریئر بہترین 24ویں نمبر پر آ گئے، محمد عامر کی 3 درجے ترقی ہوئی ہے، فہیم اشرف 48 اور شاداب خان 23 درجے چھلانگ لگا کر بالترتیب 58 ویں اور 78ویں نمبر پر آ گئے۔ منگل کو آئی سی سی کی طرف سے جاری کردہ تازہ ترین ٹیسٹ پلیئرز رینکنگ کے تحت بلے بازوں میں ویرات کوہلی بدستور سرفہرست ہیں، ایڈن مرکرم 2 درجے اوپر چڑھ کر آٹھویں نمبر پر آ گئے، ہاشم آملہ بھی تین درجے بہتری کے ساتھ ٹاپ ٹین میں واپس آ گئے، ڈی کوک 12 سیڑھیاں چڑھ کر 14ویں نمبر پر آ گئے، پاکستانی بلے باز بابر اعظم نے 5 درجے ترقی پا کر کیریئر بہترین 20ویں پوزیشن پا لی اور اس کے ساتھ ہی وہ ٹاپ رینکڈ پاکستانی بلے باز بھی بن گئے، اسد شفیق ایک درجہ بہتری کے بعد 23ویں نمبر پر آ گئے، اظہر علی 6 درجے تنزلی کے بعد ٹاپ ٹونٹی سے باہر ہو گئے اور انہوں نے 25ویں پوزیشن سنبھال لی، امام الحق 23 درجے بہتری کے ساتھ 73ویں اور شان مسعود 2 درجے اوپر چڑھ کر 63ویں نمبر پر آ گئے، باﺅلرز میں کگیسوربادا سرفہرست ہیں، جیمز اینڈرسن دوسرے اور فلینڈر تیسرے نمبر پر ہیں، ڈونے اولیویئر 8 درجے ترقی پا کر کیریئر بہترین 24ویں نمبر پر آ گئے، محمد عامر تین سیڑھیاں چڑھ کر 31ویں نمبر پر آ گئے، فہیم اشرف 48 درجے اور شاداب خان 23 درجے چھلانگ لگا کر بالترتیب 58ویں اور 78ویں نمبر پر آ گئے، آل راﺅنڈرز میں شکیب الحسن سرفہرست ہیں۔
