اسلام آباد۔28اگست (اے پی پی):ترکیہ کے صدر رجب طیب ایردوان نے پاکستان کے مختلف حصوں میں سیلاب سے قیمتی جانوں اور املاک کے نقصانات پر پاکستان کے عوام کے ساتھ یکجہتی کا اظہار کرتے ہوئے ہرممکن مدد کی پیشکش کی ہے۔ وزیراعظم آفس کے میڈیا ونگ سے جمعرات کو جاری بیان کے مطابق وزیراعظم محمد شہباز شریف سے جمہوریہ ترکیہ کے صدر رجب طیب ایردوان نے ٹیلی فون پر رابطہ کیا۔ ترک صدر نے کہا کہ ترکیہ امدادی کارروائیوں کے حوالے سے ہر ممکن مدد کے لئے تیار ہے۔
وزیراعظم نے اس مشکل وقت میں ترک صدر کے جذبات اور ان کی طرف سے مدد کی فراخدلانہ پیشکش کا شکریہ ادا کرتے ہوئے کہا کہ ترکیہ کے صدر کی طرف سے رابطہ پاکستان اور ترکیہ کے مابین مضبوط، گہرے اور برادرانہ تعلقات کا عکاس ہے، دونوں ممالک ہمیشہ ایک دوسرے کے شانہ بشانہ کھڑے رہے ہیں۔ بیان کے مطابق دونوں رہنمائوں نے اس سال کے شروع میں ہونے والی اپنی بات چیت کے تناظر میں بھی تبادلہ خیال کیا۔ اس کے علاوہ چین کے شہر تیانجن میں شنگھائی تعاون تنظیم کے سربراہی اجلاس کے دوران اپنی آئندہ ہونے والی ملاقات پر بھی گفتگو کی۔
