فیصل آباد۔ 04 اپریل (اے پی پی):فیصل آباد الیکٹرک سپلائی کمپنی(فیسکو)کی طرف سے ریجن بھر میں عید تعطیلات پر تین دن کے دوران فیسکوہیڈکواٹرزمیں قائم سپیشل مانیٹرنگ سیل میں فیسکوکے تمام چھ آپریشن سرکلز میں متعلقہ کل1533شکایات کا اندراج ہوا جن کاجلدازجلد ازالہ کردیاگیاجبکہ فیسکوکی طرف سے ریجن بھر میں عید تعطیلات کے دوران صارفین کو بجلی کی بلاتعطل فراہمی کوبھی یقینی بنایاگیا۔فیسکو کے شعبہ تعلقات عامہ کے ترجمان سعید رضا نے بتایا کہ چیف ایگزیکٹوفیسکوانجینئرمحمد عامر کی ہدایات پر عید کی تعطیلات میں صارفین کو بجلی کی مسلسل ترسیل کی مانیٹرنگ کیلئے فیسکو ہیڈکوارٹرز میں سپیشل مانیٹرنگ سیل بنایاگیا تھا جبکہ صارفین کی شکایات کے فوری ازالہ کیلئے خصوصی ٹیمیں تشکیل دی گئی تھیں جس کی نگرانی چیف ایگزیکٹو فیسکو انجینئر محمد عامر نے خود کی۔
انہوں نے بتایا کہ عیدکے موقع پر فیسکو ریجن میں بجلی کی طلب تقریباً1123میگاواٹ رہی جبکہ فیسکوکو 1273میگاواٹ بجلی کا کوٹہ الاٹ کیاگیاتھا جس کے باعث طلب و رسد میں توازن کی بدولت ریجن کے آٹھوں اضلاع میں کہیں بھی لوڈمینجمنٹ نہیں کی گئی۔انہوں نے بتایا کہ فیسکو کے مختلف اعلیٰ افسران نے تعطیلات کے دوران لوڈ مینجمنٹ،ایل ٹی/ایچ ٹی بریک ڈاؤن اورصارفین کی انفرادی شکایات کے ازالے کے علاوہ کسی بھی ہنگامی صورتحال اور بجلی کے تعطل کی صورت میں فوری بحالی کے کام کو مانیٹرکیا
اور فیسکو چیف کوتمام آپریشن سے مسلسل اپ ڈیٹ رکھاجبکہ کسی بھی ایمرجنسی یا ہنگامی صورتحال سے نمٹنے کیلئے آپریشن سٹاف کی ڈیوٹیاں لگائی گئی تھیں جبکہ آپریشن سٹاف کو ٹرانسفارمر ٹرالیاں اور اضافی آلات و سامان بھی مہیا کیاگیا تھا تاکہ خراب ٹرانسفارمر یا کسی بھی آلات کو فوری طور پر تبدیل کرکے بجلی کی روانی برقرار رکھی جاسکے۔انہوں نے بتایا کہ فیسکوہیڈکوارٹرز اور چھ آپریشن سرکلز میں قائم مرکزی شکایات مراکز میں عملہ 24 گھنٹے متحرک رہااور فالٹ یا ٹرپنگ کی صورت میں فوری رسپانس کرتے ہوئے فیڈرز کو چلایا گیا۔
Short Link: https://urdu.app.com.pk/urdu/?p=578401
