جدید طریقہ کاشت اور زرعی ٹیکنالوجی کے استعمال سے گندم کی فی ایکڑ پیداوار 60 من تک حاصل کی جا سکتی ہے، زرعی ماہرین

جدید طریقہ کاشت اور زرعی ٹیکنالوجی کے استعمال سے گندم کی فی ایکڑ پیداوار 60 من تک حاصل کی جا سکتی ہے، زرعی ماہرین

فیصل آباد۔ 18 نومبر (اے پی پی):ریسرچ انفارمیشن یونٹ آری فیصل آباد کے زرعی ماہرین نے کہا کہ جدید طریقہ کاشت سے 60 من فی ایکڑ تک گندم کی پیداوار حاصل کی جاسکتی ہے، کاشتکار پوٹاش کے استعمال سمیت جدید ٹیکنالوجی کا استعمال بھی یقینی بنائیں۔زرعی ماہرین کا کہنا ہے کہ پوٹاش کا استعمال گندم کے دانے کا وزن بڑھانے، فصل کو بیماریوں سے محفوظ رکھنے اور گرنے سے بچانے میں انتہائی معاون ثابت ہو رہا ہے جس کی بدولت بمپر کراپ کاحصول ممکن ہو سکے گا۔ انہوں نے بتایاکہ اگر سفارش کردہ مقدار کے مطابق بیج کی بوائی اور جڑی بوٹیوں پر بروقت قابو پانے سمیت بیج کو دوائی لگا کر کاشت کیاجائے تو فی ایکڑ بہتر پیداوار حاصل ہو سکتی ہے۔

انہوں نے بتایاکہ تحفظ نباتات کے اصولوں کے مطابق نوکیلے اور چوڑے پتوں والی جڑی بوٹیوں بشمول باتھو، لہلی، لہیہ وغیرہ کو کنٹرول کرنے کیلئے پہلے پانی کے بعد وتر حالت میں سپرے کرنا چاہیے جبکہ نوکیلے و چھوٹے پتے والی جڑی بوٹیوں بشمول دنبی سٹی، جنگلی جئی کو کنٹرول کرنے کیلئے دوسرے پانی کے ساتھ سپرے اشد ضروری ہے۔ انہوں نے کہاکہ کاشتکاروں کو پیداوار بڑھانے کیلئے اس عز م کا اعادہ کرناچاہیے کہ وہ جدید ٹیکنالوجی کے استفادہ سمیت ماہرین زراعت کی سفارشات پر مکمل عملدرآمد یقینی بنائیں گے۔ انہوں نے کہاکہ اس ضمن میں مزید مشاورت اور رہنمائی کیلئے زرعی ماہرین یا محکمہ زراعت کے فیلڈ سٹاف سے بھی رابطہ کیاجاسکتاہے۔

مزید خبریں