اسلام آباد۔1مئی (اے پی پی):وفاقی وزیر اطلاعات و نشریات چوہدری فواد حسین نے کہا ہے کہ حلقہ این اے 249 میں ٹرن آئوٹ بہت کم رہا، الیکشن کمیشن نے حکم امتناع دے کر اچھا کیا، الیکشن کیشن کو دوبارہ گنتی کی بجائے ری الیکشن کی طرف جانا چاہئے۔
ہفتہ کے روز الیکشن کمیشن کے حکم پر ردعمل کا اظہار کرتے ہوئے وفاقی وزیر اطلاعات و نشریات چوہدری فواد حسین نے کہا کہ حلقہ این اے 249 میں ٹرن آئوٹ بہت کم رہا، مجموعی طور پر 21 فیصد رجسٹرڈ ووٹ ڈالے گئے، جیتنے والا امیدوار 5 فیصد سے بھی کم ووٹ حاصل کر کے ایم این اے بن گیا، اس قسم کا الیکشن جمہوریت کے ساتھ مذاق ہوگا۔ انہوں نے کہا کہ پیپلز پارٹی کے حالات ہر ایک کو معلوم ہیں، پیپلز پارٹی کے امیدوار کی جیت پر تمام جماعتوں نے تنقید کی ہے۔ وفاقی وزیر اطلاعات نے کہا کہ ہر الیکشن میں ہارنے والی پارٹی جیتنے والے پر تنقید کرتی ہے، ری الیکشن کا مطالبہ کرتی ہے۔
انہوں نے کہا کہ عمران خان وہ واحد لیڈر ہیں جو بار بار اس معاملہ پر اتفاق پیدا کرنے کی ضرورت پر زور دے رہے ہیں، ہم اس مسئلہ پر سیاسی جماعتوں کو بات چیت کی دعوت دے چکے ہیں۔ انہوں نے کہا کہ اگر اپوزیشن اصلاحات کے لئے تیار نہیں تو روئے بھی نہ۔
