اسلام آباد ۔ 28 مئی (اے پی پی) پاکستان تحریک انصاف کے مرکزی سیکرٹری اطلاعات عمر سرفراز چیمہ نے کہا ہے کہ حمزہ شہباز کو 26 ملین ڈالر کا حساب دینا ہو گا، ان کی پریس کانفرنس رونے دھونے اور نیب کو بلیک میل کرنے کے علاوہ کچھ نہیں تھی۔ منگل کو پاکستان تحریک انصاف کے مرکزی میڈیا ڈیپارٹمنٹ سے جاری بیان کے مطابق انہوں نے کہا کہ حمزہ شہباز آج تک نہیں بتا سکے کہ 26 ملین ڈالر شریف ٹبر کے اکاﺅنٹ میں ٹی ٹی کے ذریعے کیوں اور کیسے آیا۔ انہوں نے کہا کہ پریس کانفرنسوں میں اداروں کو بلیک میل کرنے سے جان نہیں چھوٹے گی، میڈیا کے سامنے بڑھکیں جبکہ عدالت میں پیش کرنے کو کوئی ثبوت نہیں۔ انہوں نے کہا کہ پہلے دن سے چوری، کرپشن، منی لانڈرنگ کا جواب دینے کی بجائے پورا ٹبر کبھی نیب، کبھی جے آئی ٹی، کبھی عدالت اور کبھی فوج پر حملے کر رہا ہے۔ عمر سرفراز چیمہ نے کہا کہ پانامہ لیکس کے بعد سے اب تک یہ خاندان احتساب سے بچنے کیلئے صرف دھونس اور دھمکیوں کا استعمال کرتا آیا ہے، حمزہ کے والد سمیت خاندان کے کلیدی افراد مفرور ہیں یا نیب میں زیرِ تفتیش ہیں۔ انہوں نے کہا کہ سیاست کی سیڑھی استعمال کرکے یہ خاندان ملک کا کرپٹ ترین خاندان بن چکا ہے، جمہوریت سے حمزہ شہباز کے خاندان کا دور دور تک تعلق نہیں۔
