اسلام آباد۔25اگست (اے پی پی):وزیر اعظم محمد شہباز شریف نے کہا ہے کہ ملکی برآمدات میں صنعت مرکزی حیثیت رکھتی ہے ، حکومت صنعتی پیداوار میں اضافے اور صنعتوں کو درپیش مسائل کے پائیدار حل کے لیے ترجیحی بنیادوں پر کام کر رہی ہے۔ ان خیالات کا اظہار انہوں نے پیر کو یہاں قومی صنعتی پالیسی کے حوالے سے اہم اجلاس کی صدارت کرتے ہوئے کیا ۔ وزیراعظم آفس کے میڈیا ونگ سے جاری بیان کے مطابق وزیر اعظم نے کہا کہ صنعتوں کی ترقی کے ذریعے برآمدات پر مبنی معیشت، ملکی صنعتوں کو عالمی معیار کے مطابق افرادی قوت اور جدید ٹیکنالوجی سے لیس کرنا ہماری اولین ترجیح ہے۔
انہوں نے قومی صنعتی پالیسی کے حوالے سے تمام سٹیک ہولڈرز سے مشاورت کی ہدایت کی۔ اجلاس کو قومی صنعتی پالیسی کے حوالے سے تجاویز پر بریفنگ دی گئی۔ اجلاس میں وفاقی وزیر برائے منصوبہ بندی احسن اقبال ، وفاقی وزیر قومی غذائی تحفظ رانا تنویر حسین ، وفاقی وزیر اقتصادی امور احد خان چیمہ ، وفاقی وزیر برائے مواصلات عبدالعلیم خان، وفاقی وزیر تجارت جام کمال خان ،وفاقی وزیر خزانہ و محصولات محمد اورنگزیب ، وفاقی وزیر پاور ڈویژن سردار اویس احمد لغاری ، وزیر مملکت برائے خزانہ و ریلوے بلال اظہر کیانی ، ملک کے اہم چیمبرز آف کامرس اینڈ انڈسٹری کے نمائندگان اور متعلقہ اعلیٰ سرکاری افسران نے شرکت کی۔
