کراچی۔24جنوری (اے پی پی):وفاقی وزیر برائے مواصلات مولانا اسعد محمود نے کہا ہے کہ موجودہ پی ڈی ایم حکومت قومی معیشت کو مضبوط بنانے، ملک میں سیاسی استحکام لانے اور شہریوں کا معیار زندگی بلند کرنے کے لیے پرعزم ہے۔ان خیالات کا اظہار انہوں نے یہاں منگل کو جی پی او میں پوسٹ مینوں میں ملکیتی بنیادوں پر موٹر سائیکلوں کی تقسیم کے حوالے سے منعقدہ تقریب سے خطاب کر تے ہوئے کیا۔ اس موقع پر وفاقی سیکرٹری مواصلات کیپٹن (ر) خرم آغا، ڈائریکٹر جنرل پوسٹل سروسز رانا حسن اختر، جے یو آئی (ف) کے رہنما مولانا راشد محمود سومرو اور پوسٹل سروسز کے دیگر سینئر افسران بھی موجود تھے۔
وفاقی وزیر نے اس عزم کا اظہار کیا کہ موجودہ مخلوط حکومت ملک کے روشن مستقبل اور معیشت کو پائیدار بنیادوں پر استوار کرنے کے لیے پرعزم ہے۔ انہوں نے کہا کہ پاکستان تحریک انصاف (پی ٹی آئی) کی حکومت نے نہ صرف ملک کے سیاسی، معاشی اور سماجی شعبوں کو تباہ کیا بلکہ انہوں نے اپنی کارکردگی کو بہتر طور پر پیش کرنے کے لیے پاکستان پوسٹ کی منافع بخش خدمات کو بھی نقصان پہنچایا۔انہوں نے کہا کہ ان لوگوں کے خلاف انکوائری شروع کر دی گئی ہے جو پاکستان پوسٹ کی منافع بخش خدمات کو خطرے میں ڈالنے کے ذمہ دار تھے۔
وفاقی وزیر نے کہا کہ پاکستان پوسٹ کی جانب سے موصول ہونے والی تمام تجاویز پر عمل درآمد کیا جا رہا ہے اور پوسٹل سروسز کے معیار کو بلند کرنے اور ادارے کی مالی حالت کو بحال کرنے کے لیے کئی اقدامات کئے جا رہے ہیں۔انہوں نے کہا کہ پی ٹی آئی حکومت نے اپنے دور میں مواصلات کے شعبے میں کوئی میگا پراجیکٹ شروع نہیں کیا جبکہ موجودہ حکومت نے سکھر حیدرآباد موٹروے (M6) کا سنگ بنیاد رکھا۔ انہوں نے مزید کہا کہ M-6 پر ترقیاتی کام جلد شروع ہو جائے گا اور یہ اگلے تین سالوں میں مکمل ہو جائے گا۔
وفاقی وزیراسعد محمود نے بتایا کہ کراچی حیدرآباد موٹروے (M-9) کی توسیع کا ایک اور منصوبہ زیر غور ہے جس کے تحت موجودہ موٹر وے کے ساتھ ساتھ ایک نئی الائنمنٹ تعمیر کی جائے گی تاکہ مسافروں اور مال بردار ٹریفک کو مزید سہولت فراہم کی جاسکے۔اسعد محمود نے کہا کہ جمعیت علمائے اسلام (ف) کی قیادت پاکستان کے اسلامی اور ثقافتی نظریہ کے تحفظ کے لیے پرعزم ہے اور جے یو آئی (ف) نے مختلف سیاسی جماعتوں کو اس نازک موڑ پر ایک پلیٹ فارم پر اکٹھا کیا جب پی ٹی آئی کی غلط مہم جوئی کی وجہ سے پیدا ہوئی صورتحال سے نمٹنے کے لیے پاکستان کو اتحاد اور یکجہتی کی ضرورت تھی۔
وفاقی وزیر نے کہا کہ پوسٹل سروسز میں متعدد آسامیاں خالی پڑی ہیں جس سے ادارے کی کارکردگی متاثر ہو رہی ہے۔ انہوں نے کہا کہ بھرتی کا طریقہ کار آخری مرحلے میں ہے اور اس عزم کا اظہار کیا کہ موجودہ حکومت کے اہم تنظیم نو کے اقدامات سے پاکستان پوسٹ 22 کروڑ عوام کی خدمت کر سکے گی۔ڈائریکٹر جنرل پاکستان پوسٹ رانا حسن اختر نے اس موقع پر اظہار خیال کرتے ہوئے کہا کہ پاکستان پوسٹ کی سیونگ اکاؤنٹ سروس پی ٹی آئی کی سابقہ حکومت نے بند کی تھی جسے بحال کیا جائے گا کیونکہ یہ پاکستان پوسٹ کی منافع بخش خدمت ہے۔
انہوں نے کہا کہ 100 موٹر سائیکلیں ملکیتی بنیادوں پر پوسٹ مین کے حوالے کی جا رہی ہیں اور اس سے ان کی کارکردگی کو بہتر بنانے اور صارفین کو بہتر خدمات کو یقینی بنانے میں مدد ملے گی۔ بعد ازاں وفاقی وزیر نے ڈاکومنٹس اور موٹر سائیکلوں کی چابیاں پوسٹ مین کے حوالے کیں۔
