اسلام آباد۔13جنوری (اے پی پی):وفاقی وزیرخزانہ ڈاکٹرعبدالحفیظ شیخ نے کہاہے کہ پاکستان تحریک انصاف کی حکومت ملک میں صنعتی ترقی کی حوصلہ افزائی اورعوام کیلئے روزگارکے مواقع بڑھانے کیلئے کوششیں کررہی ہے۔ بدھ کوسماجی رابطے کی ویب سائیٹ ٹوئٹرپرجاری پیغام میں انہوں نے کہاکہ نومبر2020 میں ملک میں بڑی صنعتوں کی پیداوارمیں نومبر2019 کے مقابلہ میں 14.5 فیصدکا دوہندسی اضافہ ہوا،اس سے ملک میں صنعتی ترقی کی حوصلہ افزائی اورعوام کیلئے روزگارکے نئے مواقع بڑھانے کیلئے پاکستان تحریک انصاف کی حکومت کی کوششوں کی عکاسی ہورہی ہے۔پاکستان بیورو برائے شماریات (پی بی ایس ) کے مطابق بڑی صنعتوں کی پیداوار اشاریہ ایل ایس ایم آئی کے مطابق ملک میں بڑی صنعتوں کی پیداوار میں نومبر 2020 کےدوران 14.46 فیصد اضافہ ریکارڈ کیا گیا ہے، اکتوبر کے مقابلہ میں نومبر کے مہینے میں بڑی صنعتوں کی پیداوار میں اضافہ کی شرح 1.35 فیصد رہی۔ مالی سال کے پہلے پانچ ماہ میں بڑی صنعتوں کی پیداوار گزشتہ مالی سال کے اسی عرصہ کے مقابلہ میں 7.41 فیصد اضافہ ریکارڈ کیا گیا ہے۔ اس عرصہ میں ٹیکسٹائل ، خوراک، مشروبات، تمباکو، پٹرولیم مصنوعات، ادویات و طبی آلات اور کیمیکلز کی پیداوار میں اضافہ دیکھنے میں آیا۔ اسی طرح غیر دھاتی معدنی مصنوعات ، آٹو موبائل، فرٹیلائزرز اور پیپر بورڈ کی پیداوار میں بھی اضافہ کاعمومی رجحان دیکھنے میں آیا ۔ اس کے برعکس آئرن، سٹیل، الیکٹرانک اور لیبر مصنوعات کی پیداوار میں کمی ہوئی ہے ۔ ٹیکسٹائل کی پیداوار میں 0.70فیصد، خوراک و مشروبات و تمباکو کی پیداوار میں 3.08 فیصد، کوک اور پٹرولیم مصنوعات کی پیداوار میں 0.09 فیصد کااضافہ ہوا ہے
