اسلام آباد ۔ 15 جون (اے پی پی) وفاقی وزیر اطلاعات و نشریات سینیٹر شبلی فراز نے کہا کہ حکومت ملک میں کورونا وائرس کے پھیلائو کی روک تھام کیلئے زمینی حقائق پر مبنی پالیسی پر عمل پیراہے۔ میڈیا سے گفتگو کرتے ہوئے انہوں نے کہا کہ نیشنل کمانڈ اینڈ آپریشن سنٹر روزانہ کی بنیاد پرصورتحال کا جائزہ لے کر فیصلے کر رہا ہے۔ اگلے ماہ کورونا وائرس کے مریضوں کی تعداد میں متوقع اضافہ کے پیش نظر حکومت کی جانب سے ممکنہ تیاری کے حوالہ سے انہوں نے کہاکہ دنیا میں صحت کا کوئی بھی نظام اس قسم کے بڑے بحران کا مقابلہ نہیں کر سکتا تاہم حکومت صورتحال سے مؤثر اندازمیں نمٹنے کیلئے بھرپورکوشش کرے گی۔ سینیٹر شبلی فراز نے کہا کہ حکومت نے کمزور مالی وسائل کے باوجود صحت کی سہولیات میں تقریباً تین گنا اضافہ کیا ہے۔ انہوں نے کہا کہ ان سہولیات میں وینٹی لیٹرز کی تعداد 2800 سے بڑھا کر 4800 کی گئی ہے جبکہ مزید 1400 وینٹی لیٹرز کا انتظام کیا جا رہا ہے۔ انہوں نے کہا کہ وفاقی دارالحکومت کے ہسپتالوں میں 800 بیڈز کا اضافہ کیا گیا ہے۔ اس کے علاوہ خیبرپختونخوا اور پنجاب میں آکسیجن والے بستروں(Oxygenated بیڈز) سمیت ہزاروں بستروں کی فراہمی شامل ہے۔
