اسلام آباد ۔ 11 جون (اے پی پی) وزیرخارجہ مخدوم شاہ محمود قریشی نے کہا ہے کہ خطے کے تمام ممالک بھارت سے نالاں ہیں،خلیج کے خطے کے مسلمانوں کے جذبات واحساسات بھی بھارت کے بارے میں اچھے نہیں، بھارتی رویہ سے ان کے جذبات کو ٹھیس پہنچی ہے۔ جمعرات کو اپنے ایک بیان میں وزیر خارجہ نے کہا کہ پاکستان،خطے میں امن و استحکام کا خواہاں ہے۔ہماری توجہ افغانستان پر ہے ہم افغان امن عمل کو آگے بڑھانے پر توجہ مرکوز کئے ہوئے ہیں۔ہم کشمیر کے مسئلے کا حل چاہتے ہیں ہم ہندوستان کی بربریت کے خلاف آواز اٹھاتے رہیں گے۔انہوں نے کہا کہ اگر ہندوستان یہ سمجھتا ہے کہ ہم ان کی دھمکیوں سے کشمیریوں کی حمایت سے پیچھے ہٹ جائیں گے تو یہ ان کی غلط فہمی ہے جو انہیں دل سے نکال دینی چاہیے۔ ہمارا موقف اصولی ہے اور ہم اصولی موقف پر قائم ہیں بین الاقوامی صورتحال ہمارے موقف کی تائید کرتی ہے۔ اگر ہندوستان نے کوئی حماقت کی تو منہ توڑ ، بھرپور اور فی الفور جواب دیں گے۔ وزیر خارجہ نے کہا کہ اقوام متحدہ کی سلامتی کونسل اور او۔آئی۔سی کی قراردادیں تنازعہ جموں و کشمیر پرہمارے اصولی موقف کو تقویت دیتی ہیں۔امیت شا، نریندر مودی بتائیں کہ لداخ میں کیا ہورہا ہے؟ ہندوستان کا میڈیا کیوں خاموش ہے۔ ساری دنیا کا میڈیا کہہ رہا ہے کہ آپ نے اپنا ایریا سرنڈر کردیا، آپ نے متنازعہ علاقے میں شرارت کی، اس پر ردعمل فطری تھا۔ ہم تو اپنا دفاع اللہ کے کرم سے کرلیں گے،آپ لداخ پر جواب دیں؟ کیاآپ کا سرجیکل سٹرائیک کا رعب صرف پاکستان کے لئے ہے؟۔شاہ محمود قریشی نے کہا کہ ہندوستان معاشی طورپر پٹ چکا ہے، یونیورسٹی آف شکاگو، یونیورسٹی آف پینسلوینیا، خود بھارتی معاشی تحقیقی مرکز کی رپورٹ اس امر کا ثبوت ہے۔ان اداروں کی رپورٹس بتارہی ہیں کہ لاک ڈاون کی وجہ سے بھارت کا ستیاناس ہوچکا ہے۔84 فیصد کنبوں کی آمدنی گر گئی ہے، 11 سال میں بھارت میں اتنی کم شرح نمو نہیں تھی جو کورونا پر غلط حکمت کی وجہ سے ہوئی ہے۔ بھارتی شہریوں کے لئے خوراک اورغذائی قلت کا چیلنج بہت بڑھ چکا ہے،لوگ ڈپریشن کا شکار ہورہے ہیں ، گھروں میں تشدد بڑھ گیا ہے، بھارتی حکومت ناکام ہوچکی ہے۔اس صورتحال میں توجہ ہٹانے کے لئے بھارت دھمکیاں دیتا ہے اورپاکستان کے خلاف جارحیت کے بیان دیتا ہے ۔ بھارت کو جموں وکشمیر اور لداخ میں مار پڑ رہی ہے، معیشت برباد اور اپوزیشن بھارتی حکومت پر الزام لگارہی ہے۔ بھارتی حکمران پاکستان کو سافٹ ٹارگٹ سمجھتے ہیں لیکن پاکستان سافٹ ٹارگٹ نہیں۔ نیپال اوربنگلہ دیش آپ سے کیوں نالاں ہے۔ چین سے آپ کا مسئلہ کیا ہے ۔ سری لنکا آپ سے خوش کیوں نہیں۔ خطے کے تمام ممالک بھارت سے نالاں ہیں۔اس کے علاوہ خلیج کے خطے کے مسلمانوں کے جذبات واحساسات بھی بھارت کے بارے میں اچھے نہیں، بھارتی رویہ سے ان کے جذبات کو ٹھیس پہنچی ہے۔ وزیر خارجہ نے کہا کہ ایل او سی پر بھارت کی طرف سے مسلسل خلاف ورزیاں ہورہی ہیں۔یہ ہندوستان کی سوچی سمجھی سٹریٹجی ہے تاکہ عوام اور میڈیا کی توجہ اپنی ناکامیوں سے ہٹائی جاسکے۔
