پشاور۔ 10 اگست (اے پی پی):اگلے 24 گھنٹوں کے دوران صوبہ خیبرپختونخوا کے مختلف اضلاع میں گرج چمک کے ساتھ بارش کا امکان ہے۔ پرونشل ڈیزاسٹر مینجمنٹ اتھارٹی (پی ڈی ایم اے) کے مطابق مون سون کے دھارے بحیرہ عرب سے ملک کے مشرقی اور بالائی حصوں میں مسلسل داخل ہو رہے ہیں جبکہ مغربی لہر کا ایک گرت خطے کے شمالی حصوں میں بھی موجود ہے۔ اگلے 24 گھنٹوں میں صوبے کے بیشتر حصوں میں بنیادی طور پر ابر آلود اور مرطوب موسم کی توقع ہے۔
چترال، اپر اور لوئر دیر، سوات، مالاکنڈ، باجوڑ، شانگلہ، بونیر، کوہستان، تورغر، بٹگرام، مانسہرہ، ایبٹ آباد، ہری پور، صوابی، مردان، چارسدہ، نوشہرہ، مہمند، پشاور، خیبر، کوہاٹ، کرک، ہنگو اور کرم میں گرج چمک کے ساتھ بارش کا امکان ہے۔ پی ڈی ایم اے کے مطابق موسلا دھار بارش صوبے کے نشیبی علاقوں میں شہری سیلاب کا سبب بن سکتی ہے، صوبے کے پہاڑی علاقوں کے خطرناک مقامات پر لینڈ سلائیڈنگ سڑکوں میں خلل ڈال سکتی ہے، موسلا دھار بارش، آندھی اور بجلی گرنے سے روزمرہ کے معمولات متاثر ہو سکتے ہیں۔
