رحیم یارخان ۔ 04 ستمبر (اے پی پی):ڈپٹی کمشنر شکیل احمد بھٹی نے کہا ہے کہ شرح خواندگی میں اضافہ کئے بغیر کوئی قوم ترقی نہیں کر سکتی ہے، حکومت پنجاب سکول سے باہر بچوں کو تعلیمی اداروں میں لانے کے لئے غیر معمولی اقدامات کر رہی ہے اور اس میں نان فارمل ایجوکیشن ادارہ کا اہم کردار ہے جسے فراموش نہیں کیا جا سکتا۔ان خیالات کا اظہار انہوں نے عالمی یوم خواندگی کے حوالہ سے تقریب سے خطاب کرتے ہوئے کیا۔
انہوں نے محکمہ لٹریسی کے اساتذہ کو خراج تحسین پیش کرتے ہوئے کہا کہ نہایت محدود وسائل کے باوجود یہ اساتذہ قومی جذبے کے ساتھ اپنی خدمات سر انجام دے رہے ہیں جس پر ہم انہیں سلام پیش کرتے ہیں۔سی ای او ایجوکیشن اتھارٹی محمد اعجاز اسلم چوہدری نے اپنے خطاب میں کہا کہ نان فارمل ایجوکیشن سے فارمل ایجوکیشن میں منتقل ہونے والے طلباء کی سہولت کے لئے محکمہ اپنا مکمل تعاون فراہم کرے گا۔انہوں نے لٹریسی ڈیپارٹمنٹ کی شعبہ تعلیم میں خدمات اور شرح خواندگی میں اضافے کے لئے کردار کو سراہا۔
قبل ازیں ڈی او لٹریسی محمد علی خان نے کہا کہ ضلع میں 70ہزار بچے سکول سے باہر ہیں جنہیں سکولوں میں لانا ہمارا ہدف ہے اور حکومت پنجاب جلد ضلع میں مزید 250نان فارمل سکولز کا اضافہ کر رہی ہے جس سے شرح خواندگی میں بہتری آئے گی۔
انہوں نے بتایا کہ ضلع کے 1190نان فارمل سکولز میں 39ہزار طلباء زیور تعلیم سے آراستہ ہو رہے ہیں۔انہوں نے محکمہ لٹریسی کے ضلعی اسٹرکچر اور کارکردگی بارے شرکاء کو آگاہ کیا۔بعد ازاں ڈپٹی کمشنر شکیل احمد بھٹی نے سی ای او یجوکیشن اور ڈی او لٹریسی کے ہمراہ پوزیشن حاصل کرنے والے طلباء اور نمایاں کارکردگی دکھانے والے اساتذہ میں شیلڈ ز اور تعریفی سرٹیفکیٹس بھی تقسیم کیے۔
Short Link: https://urdu.app.com.pk/urdu/?p=386564
