ریڈیو پاکستان سیلاب زدگان کی مدد اور امدادی سرگرمیوں میں اپنا بھرپور کردار ادا کر رہا ہے، مریم اورنگزیب

اسلام آباد۔27اگست (اے پی پی):وفاقی وزیر اطلاعات و نشریات مریم اورنگزیب نے کہا ہے کہ ریڈیو پاکستان سیلاب زدگان کی مدد اور امدادی سرگرمیوں میں اپنا بھرپور کردار ادا کر رہا ہے، ریڈیو پاکستان واحد نشریاتی نیٹ ورک ہے جو سیلاب سے متاثرہ علاقوں میں ذمہ داری ادا کر رہا ہے، نیشنل ڈیزاسٹر منیجمنٹ اتھارٹی( این ڈی ایم اے) حکام اپنے نمائندے متعلقہ ریڈیو سٹیشنز پر بھجوائیں اورسیلاب متاثرین کو رہنمائی فراہم کریں۔ ان خیالات کا اظہار انہوں نے اپنی زیر صدارت اجلاس کے دوران کیا جس میں وفاقی وزیر نے فلڈ ریلیف سیل قائم کرنے کی بھی ہدایت کی ۔

وزیر اطلاعات و نشریات کی ہدایت پر سیلاب زدگان کی امداد کے لئے ریڈیو پاکستان اور اس کے ماتحت سٹیشنوں میں فلڈ ریلیف سیل قائم کر دیئے گئے ہیں ۔ وزیراطلاعات و نشریات نے کہا کہ ریڈیو پاکستان سیلاب زدگان کی مدد اور امدادی سرگرمیوں میں اپنا بھرپور کردار ادا کر رہا ہے اور ریڈیو پاکستان واحد نشریاتی نیٹ ورک ہے جو سیلاب سے متاثرہ علاقوں میں ذمہ داری ادا کر رہا ہے۔

مریم اورنگزیب نے خصوصی نشریات اور امدادی کوششیں مزید تیز کرنے پر زور دیا اور لائیو کالز کا نظام بھی وضع کرنے کی ہدایت کی تاکہ متاثرین سیلاب کو بہتر انداز میں رہنمائی فراہم کی جاسکے۔ وزیر اطلاعات ونشریات نے این ڈی ایم اے حکام پر بھی زور دیا کہ وہ اپنے نمائندوں کو متعلقہ ریڈیو سٹیشنز پر بھجوائیں تاکہ سیلاب متاثرین کی براہ راست کالز اور پیغام سن کر انہیں رہنمائی فراہم کی جا سکے۔

Short Link: https://urdu.app.com.pk/urdu/?p=324144