گال۔24جولائی (اے پی پی):سری لنکا نے پاکستان کے خلاف دوسرے اور آخری ٹیسٹ میچ کے پہلے روز اپنی پہلی اننگز میں 6 وکٹوں کے نقصان پر 315 رنز بنا لئے ، دنیش چندیمل اور اوشاڈا فرنینڈو نے نصف سنچریاں بنائیں ، نیروشن ڈکویلا 42 اور دونتھ ویلالاگے 6 رنز پر ناٹ آؤٹ ہیں ، محمد نواز نے دو وکٹیں حاصل کیں ۔ اتوار گال انٹرنیشنل سٹیڈیم میں شروع ہونے والے ٹیسٹ میچ میں سری لنکا کے کپتان دیمتھ کرونا رتنے نے ٹاس جیت کر پہلے بیٹنگ کا فیصلہ کیا ، اوپنرز نے محتاط انداز میں بیٹنگ کی اور 92 رنز کا آغاز فراہم کیا ، اوشاڈا فرنینڈو پہلے آؤٹ ہونے والے کھلاڑی تھے جو 50 رنز بنا کر محمد نواز کی گیند پر وکٹ کیپر محمد رضوان کے ہاتھوں کیچ آؤٹ ہو گئے ،
سری لنکا کو دوسرا نقصان جلد اٹھانا پڑا جب کوشال مینڈس 3 کے انفرادی سکور پر آغا سلمان کے ہاتھوں رن آؤٹ ہو گئے ، دیمتھ کرونا رتنے تیسرے آؤٹ ہونے والے کھلاڑی تھے جو 40 رنز بنا کر یاسر شاہ کا شکار بنے، اینجلو میتھیوز اور دنیش چندیمل نے چوتھی وکٹ میں 75 رنز کا اضافہ کر کے ٹیم کا سکور 195 تک پہنچا دیا ، اینجلو میتھیوز 42 رنز بنا کر نعمان علی کی گیند پر وکٹ کیپر محمد رضوان کے ہاتھوں کیچ آؤٹ ہوئے ، 258 کے مجموعی سکور پر سری لنکا کی پانچویں وکٹ گر گئی جب دنیش چندیمل 80 رنز کی عمدہ اننگز کھیلنے کے بعد محمد نواز کی گیند پر فواد عالم کے ہاتھوں کیچ آؤٹ ہو گئے ،
دہننجایا ڈی سلوا چھٹے آؤٹ ہونے والے کھلاڑی تھے جو 33 رنز بنانے کے بعد نسیم شاہ کی گیند پر کلین بولڈ ہو گئے ، اس کے بعد نیروشن ڈکویلا اور دونتھ ویلالاگے نے کھیل کے اختتام تک مزید کوئی نقصان نہ ہونے دیا اور ٹیم کا سکور 6 وکٹوں کے نقصان پر 315 تک پہنچا دیا، نیروشن ڈکویلا 42 اور دونتھ ویلالاگے 6 رنز کے ساتھ وکٹ پر موجود ہیں ، محمد نواز نے دو جبکہ یاسر شاہ، نسیم شاہ اور نعمان علی نے ایک، ایک وکٹ حاصل کی ۔
